अखबार नेपाल ट्रेन्डिङ

काठमाडौं: आज संसद दिवसको अवसरमा प्रतिनिधिसभाका सभामुख अग्नि सापकोटा र राष्ट्रिय सभाका अध्यक्ष गणेश तिमिल्सिनाले संयुक्त रुपमा विज्ञप्ती सहित शुभकामना सन्देश जारी गरेका छन् । राज्य पुनर्संरचना र संघीय शासन प्रणालीको कार्यान्वयन गर्न तीनै तहमा संसदीय अभ्यासलाई प्रभावकारी बनाइ जगदेखि नै मजबुत बनाउन सबै क्षेत्रको सहयोग अपरिहार्य रहेको विज्ञप्तीमा जनाइएको छ ।

विक्रम सम्बत २०१५ सालमा भएको पहिलो निर्वाचनपछि २०१६ साल असार १६ गते जननिर्वाचित संसदको पहिलो बैठक बसेको दिनको सम्झनामा यो दिवस मनाइँदै आएको छ । विज्ञप्तिमा संसदीय अभ्यासलाई सुधार गर्नुपर्ने अवस्था आएको उल्लेख गरिएको छ । जनताका प्रतिनिधिमार्फत शासन संचालन गरिने सर्वोत्तम शासन व्यवस्थाको रुपमा संसदीय शासन प्रणालीलाई लिने गरिन्छ । संसदीय अभ्यासलाई निरन्तर सुधार गरी यसका मुल्य र मान्यतालाई संस्थागत गर्दै व्यवहारमा उतार्न हरदम प्रयत्न गर्नुपर्ने विज्ञप्तीमा उल्लेख छ ।

गत वर्ष विभिन्न कार्यक्रम गरी मनाइँदै आएपनि यस वर्ष भने कोरोना भाइरस संक्रमणको जोखिमले औपचारिक कार्यक्रम आयोजना गरिएको छैन ।