अखबार नेपाल ट्रेन्डिङ

काठमाडौं: आज बसेको नेपाल कम्युनिष्ट पार्टी (नेकपा)को स्थायी कमिटीको बैठकले सरकारले गर्न बाँकी रहेको कामको छलफल गर्ने एजेन्डा दोस्रो नम्बरमा भएपनि त्यसको रिपोर्ट तयार नभएकाले सीमाको विषयमा बैठक प्रवेश भएको स्थायी कमिटी सदस्य एवं पर्यटन मन्त्री योगेश भट्टराईले जानकारी दिए ।

नेपाल सरकारले भारतसँगको लिपुलेक, लिम्पियाधुरा र कालापानी सीमा विवादमा चालेको कदमको स्थायी कमिटी सदस्यहरुले प्रशंसा गर्दै नक्सा सार्वजनिक गर्ने काममा जुटाएको राष्ट्रिय सहमतिका लागि धन्यवाद दिँदै भूमि फिर्ताका लागि वार्ताका बारेमा सरकारको जवाफ मागेका थिए ।

परराष्ट्रमन्त्री प्रदीप ज्ञवालीले नेपालको कालापानी र सुस्ता क्षेत्रको समस्यालाई विस्तृतमा प्रस्तुत गर्दै नेपालले सीमा विवाद सल्टाउन भारतसँग छलफलका लागि नोभेम्बर, डिसेम्बर र जनवरीमा मिति तोकेर पठाएको तर भारतले त्यसको कुनै ठोस जवाफ नदिएको जानकारी दिए ।