अखबार नेपाल ट्रेन्डिङ

काठमाडौं: स्वास्थ्य तथा जनसंख्या मन्त्रालयले सबै अस्पतालहरुलाई निर्देशिका विपरित कोरोना भाइरसको नमूना परीक्षण नगर्न निर्देशन दिएको छ । स्वास्थ्य मन्त्रालय अन्तर्गतको स्वास्थ्य अपत्कालीन कार्यसञ्चालन केन्द्रले विज्ञप्ति जारी गर्दै सबै अस्पताललाई निर्देशिका अनुसार नमूना परीक्षण गर्न निर्देशन दिएको हो ।

स्वास्थ्य मन्त्रालयले कोरोना परीक्षणका लागि विभिन्न कार्यविधि सार्वजनिक गरेको र उक्त निर्देशिकामा कोभिड–१९ परीक्षण गर्ने गराउने प्रावधानहरु उल्लेख भएकोले निर्देशिका अनुसार संकलित नमूनाहरु सम्बन्धित अस्पताल प्रमुखहरुले प्रमाणित गरेर मात्र प्रयोगशालामा पठाउनु हुन डा. गुणराज लोहनीले सार्वजनिक गरेको विज्ञप्तिमा उल्लेख छ ।

विभिन्न अस्पतालहरुले निर्देशिका विपरित नमूनाहरु संकलन गर्दै परीक्षणका लागि प्रयोगशालाहरुमा पठाउने कार्यबारे मन्त्रालयको गम्भीर ध्यानाकर्षण भएको र उक्त निर्देशिका विपरितका कुनैपनि नमुना संकलन भएमा त्यस वापतको भिटिएम परीक्षण लगायतका सम्पूर्ण खर्च सम्बन्धित अस्पताल आफैले व्यहोर्नुपर्ने जारी विज्ञप्तिमा उल्लेख छ ।