अखबार नेपाल ट्रेन्डिङ

काठमाडौं: भारतले अघोषित रुपमा नेपाली वस्तु निर्यातमा बन्देज लगाउन थालेको छ । नेपाल र भारतको सिमा जोड्ने भन्सार जोगबनी नाका र सोभन्दा पूर्वका नाकामा भारतले नेपाली वस्तु निर्यातमा अवरोध गरिरहेको छ ।

विशेषतः भारतले नेपालबाट निर्यात हुने पाम आयल, चिया, अलैँची लगायतको वस्तुमा बन्देज लगाएको हो । भारतले विदेशबाट पाम आयल आयात प्रतिबन्ध लगाए पनि नेपाललाई भने खुल्ला गरेको थियो । तर वैशाखदेखि नेपालबाट भारतले पाम आयल प्रवेश गर्न दिएको छैन । लकडाउनपछि भारतले नेपाली वस्तु निर्यातमा समस्या खडा गर्न थालेको हो । वैशाखको अन्तिम हप्तादेखि नेपालको पाम आयल भारत छिर्न दिइएको छैन । त्यही बेलादेखि भारतले नेपालको चिया निर्यातलाई पनि अवरोध गर्दै आएको उद्योग वाणिज्य तथा आपूर्ति मन्त्रालयले जानकारी दिएको छ । त्यस्तै, अहिले अलैँचीमा पनि अवरोध गरेको छ ।

नेपाली वस्तु निर्यातमा भारतले अवरोध गरेको गुनासो भन्सार विभागबाट अर्थ मन्त्रालय हुँदै वाणिज्य तथा आपूर्ति मन्त्रालयसम्म आएको एक अधिकारीले बताए । यी सामान बोकेका करिब ३० वटा ट्रक गत सातादेखि मेची भन्सारमा रोकिएको उनले बताए । भारतको भन्सारले पास नगरेपछि मेची नाका तथा जोगबानीमा चिया अलैँची, अम्रिसो लगायतका वस्तु रोकिएका छन् ।

पाम आयल र चिया निर्यातमा गरिएको अवरोधबारे वैशाखमै वाणिज्य मन्त्रालयले परराष्ट्र मार्फत भारतको केन्द्र सरकारलाई पत्र पठाएको छ । सो समस्या समाधान गर्न दिल्लीस्थित नेपाली दूतावासलाई समेत खबर गरिसकिएको मन्त्रालयको भनाइ छ । भारतको केन्द्र सरकारकै निर्देशनमा चाहिँ सो अवरोध नभएको हुनसक्ने वाणिज्य मन्त्रालयको आँकलन छ ।

नेपालले वर्षमा करिब सवा खर्ब रुपैयाँ बराबरको वस्तु निर्यात गर्छ । जसमा २० अर्बभन्दा बढीको हिस्सा पाम आयलले ओगटेको छ । त्यस्तै, अलैँची ४ अर्ब र चिया ३ अर्बको निर्यात हुने गर्छ । यी नेपालका मुख्य निर्यातजन्य वस्तु हुन् ।