अखबार नेपाल ट्रेन्डिङ

एजेन्सीः कोरोना भाईरस महामारीका कारण तीन महिना अबरुद्ध बनेको ला लिगा सुचारु भएको छ । करिब तीन महिनापछि बिहिबार सुरु लिगको पहिलो खेलमा सेभिल्लाले महत्वपूर्ण तीन अंक बटुलेको छ ।

बिहिबार राति घरेलु मैदानमा भएको खेलमा सेभिल्लाले रियल बेटिसमाथि सहज जित निकालेको छ । सेभिल्लाले रियल बेटिसमाथि २–० को जित निकालेको हो । लुकास ओक्याम्पोसले ५०औ मिनेटमा पेनाल्टीमा गोल गर्दै घरेलु टोलीलाई सुरुवाती अग्रता दिलाएका थिए । ६२औं मिनेटमा फर्नान्डो रेज्सले सेभिल्लाका लागि दोस्रो गोल गर्दै जित सुनिश्चित गरे ।

ला लिगा कोरोनाको कहरपछि युरोपमा सुरु हुने दोस्रो शीर्ष डिभिजनको लिग फुटबल हो । जितसँगै तेस्रो स्थानको सेभिल्लाले ५० अंक जोडेको छ । उसले दोस्रो स्थानको रियल मड्रिडसँगको दुरी ६ अंकमा पुर्याएको छ । शीर्ष स्थानको बार्सिलोनाको ५८ अंक छ । बार्सिलोनाले लिगमा रियल मड्रिडसंग २ अंकको अग्रता लिएको छ । लिगमा शनिबार बार्सिलोना र आईतबार रियल मड्रिडले पहिलो पटक आ आफ्नो खेल खेल्नेछन् ।