अखबार नेपाल ट्रेन्डिङ

काठमाडौं: सिटिजन लाइफ इन्स्योरेन्स कम्पनी लिमिटेडले आ.व. २०७६/०७७ को तेस्रो त्रैमासिक (चैत्र मसान्त) सम्मको वित्तीय विवरण सार्वजनिक गरेको छ । तेस्रो त्रैमासिकसम्ममा कम्पनीले आफ्नो व्यवसाय वृद्धिसँगै जीवन बिमा कोष बलियो बनाउँदै २ सय १२ प्रतिशतले वृद्धि गरेको छ ।

गत चैत्र मसान्तमा कम्पनीको जीवन बिमा कोष ४० करोड ४७ लाख रहेकोमा यस चैत्र मसान्तमा सो रकम १ अर्व २६ करोड ४५ लाख पुगेको छ । यसका साथै सोही अवधिमा कम्पनीको खुद बिमा शुल्कमा पनि ७९% को वृद्धि भएको छ । कम्पनीले गत आ.व. को चैत्र मसान्तसम्ममा खुद बिमा शुल्क ६५ करोड ५ लाख संकलन गरेकोमा यस आ. व.को सोही अवधिमा १ अर्व १६ करोड ३५ लाख खुद बिमा शुल्क संकलन गर्न सफल भएको छ ।

जीवन बिमा व्यवसायमा लगानीको अवधिले कम्पनीको आयमा प्रत्यक्ष प्रभाव पार्ने भएकोले कम्पनीले दीर्घकालीन लगानीलाई प्राथमिकता दिई कुल लगानी रकम करिव ३ अर्व ६० करोड मध्ये ९६% रकम विभिन्न बैंक तथा वित्तीय संस्थाको लामो अवधिको ऋणपत्र तथा मुद्धती निक्षेपमा लगानी गर्न सफल भएको छ ।

साथै कम्पनीले अहिलेको विषम परिस्थितिमा आफ्ना लिडरहरुको व्यवसायिक मनोवल उच्च गराउन सम्पूर्ण कर्मचारी तथा कम्पनीले निर्धारण गरेको व्यवसायिक लक्ष्य हासिल गरेका सम्पूर्ण एजेन्सी म्यानेजरहरुलाई १ लाखको कोरोना भाइरस बिमा सुविधा उपलब्ध गराउनुका साथै बिमितहरुको सुविधालाई मध्यनजर गरी ई–सेवा, फोनपे, कनेक्ट आइपीएसलगायतका डिजिटल माध्यमबाट बिमा शुल्क भुक्तानी गर्न सकिने व्यवस्था समेत गरेको छ ।