अखबार नेपाल ट्रेन्डिङ

काठमाडौं: विश्वभर महामारीको रुपमा फैलिरहेको कोरोना भाइरसको संक्रमणबाट मृत्यु हुनेहरुको संख्याको खबर मात्रै आइरहेको बेला यस संक्रमणबाट पनि उपचारपछि निको हुनेको संख्या पनि उत्तिकै छ । अन्तर्राष्ट्रिय सञ्चार माध्यमका अनुसार निको हुनेको संख्या डेढ लाख नाघिसकेको जनाएको छ ।

यसरी निको हुनेमा धेरैजसो चीनका छन् जहाँ कोरोना भाइरसको उदगम स्थल मानिन्छ । चीनमा कोरोना संक्रमितमध्ये ७६ हजार ५२ जना उपचारपछि पूर्ण स्वस्थ भएको चिनियाँ सञ्चारमाध्यमले जनाएका छन् । यस्तै स्पेनका संक्रमितमध्ये १६ हजारभन्दा बढी तथा इटालीमा १४ हजारभन्दा बढी व्यक्ति कोरोना भाइरसको संक्रमणबाट मुक्त भइसकेको अन्तर्राष्ट्रिय सञ्चारमाध्यमहरुले जनाएका छन् ।

यसैगरी इरानमा १३ हजार ९ सय ११ तथा जर्मनीमा १३ हजार ५ सय मानिसले उपचारपछि निको भएको पाईएको छ । मंगलबार बिहानसम्मको तथ्यांक अनुसार कोरोना संक्रमणबाट विश्वभर मृत्यु हुनेको संख्या विश्वरभर ३७ हजार ८ सय २० पुगेको छ । तर उपचारपछि कोरोना संक्रमणबाट मुक्त भएका बिरामीको संख्या १ लाख ६५ हजारमाथि पुगेको विभिन्न अन्तर्राष्ट्रिय सञ्चारमाध्यले उल्लेख गरेका छन् ।