अखबार नेपाल ट्रेन्डिङ

काठमाडौं: अमेरिकामा कोरोना भाइरस संक्रमितको संख्या चीनको भन्दा दोब्बर पुगेको छ । जोन्स हप्किन्स यूनिभर्सिटीको तथ्यांक अनुसार अमेरिकामा कोरोना भाइरसबाट संक्रमितको संख्या १ लाख ६४ हजारभन्दा धेरै पुगेको हो ।

पहिलो पटक कोरोनाको संक्रमण देखिएको चीनमा भने यो संख्या ८२ हजार मात्र छ । सुरुवातमा चीनमा सबैभन्दा धेरै कोरोना भाइरसका संक्रमित देखिएका थिए । तर चीन पछिल्लो समय अन्य मुलुकको तुलनामा कोरोना भाइरस नियन्त्रणमा सफल देखिएको छ ।
अमेरिकामा कोरोना भाइरसबाट हाल मृत्यु हुनेको संख्या तीन हजार नाघेको छ । अमेरिकामा मृतकहरुको संख्या चीनकै आसापस पुगेको छ । चीनमा हालसम्म ३ हजार ३ सय ५ जनाले ज्यान गुमाएका छन् । अमेरिकामा अहिलेसम्म कोरोना भाइरसबाट ३ हजार १ सय ६५ जनाले ज्यान गुमाएका छन् । त्यहाँ संक्रमितहरुको संख्या १ लाख ६४ २ सय ५३ पुगेको छ । अमेरिकामा संक्रमितहरुको संख्या बढ्दै जाँदा मृतकको संख्या पनि चुलिँदै गएको हो ।

इटालीमा अहिलेसम्म एक लाख एक हजार सात सय संक्रमित भएका छन् । इटालीमा कोरोना भाइरसको संक्रमणबीच लकडाउनको समय सीमा अझै बढाइने भएको छ । अमेरिकी सरकारका संक्रामक बिरामी विशेषज्ञ डा एन्थोनी फाउचीले अमेरिकामा कोरोना भाइरसले एकदेखि दुई लाखसम्म मानिसको ज्यान जाने चेतावनी दिएका छन् ।

भारतमा कोरोना भाइरसबाट अहिलेसम्म ३२ जनाको ज्यान गएको छ । १२ सय भन्दा धेरै संक्रमणको पुष्टि भइसकेको छ । कोरोनाबाट संक्रमणको मामिलामा अमेरिकामा चीन भन्दा दुई गुणा पुगेका छन् ।