अखबार नेपाल ट्रेन्डिङ

काठमाडौं: कोरोना भाइरस संक्रमितको उपचार गर्न नर्भिक अस्पतालले आइसोलेसन वार्ड सञ्चालनमा ल्याएको छ । कोरोनाका बिरामीका लागि निजी अस्पतालले तयार गरेको पहिलो आइसोलेसन वार्ड हो । अस्पतालका सञ्चालक वसन्त चौधरीले १५ शैय्याको पूर्ण सुविधासहितको आइसोलेसन वार्ड सञ्चालनमा ल्याइएको जानकारी ट्विटरमार्फत दिएका छन् ।

‘नर्भिक अस्पतालको मूल भवनभन्दा छुट्टै १५ शैय्याको नवनिर्मित फुल इक्विप्ड कोभिड आइसोलेसन वार्ड आजदेखि सञ्चालनमा आएको छ,’ चौधरीले ट्विटमा लेखेका छन्, ‘नर्भिक सधै तपाईंहरुको सेवामा ।’ यसअभि कोरोना भाइरस सङ्क्रमण रोकथाम तथा नियन्त्रणका लागि सरकारले स्थापना गरेको कोषमा नर्भिक अस्पतालका अध्यक्ष चौधरीले एक करोड रुपैयाँ बराबरको सहयोग गर्ने घोषणा गरिसकेका छन् ।

कोरोना भाइरस रोकथाममा सहयोग पुगोस् भन्दै चौधरीले ५० लाख बराबरको स्वास्थ्य सामग्री र ५० लाख रुपैयाँ नगद दिने घोषणा गरेका हुन् । त्यस्तै नर्भिक अस्पतालले सरकारी चिकित्सक तथा स्वास्थ्यकर्मीका लागि १७ हजार मास्क प्रदान गरेको छ । नर्भिकले डाक्टर तथा नर्सले प्रयोग गर्ने १५ हजार ‘थ्री प्लाइ’ र २ हजार ‘थ्रीएम एन ९५’ मास्क सरकारलाई हस्तान्तरण गरेको हो ।