अखबार नेपाल ट्रेन्डिङ

बाँके: बाँकेमा निर्माणाधीन राष्ट्रिय गौरवको सिक्टा सिँचाइ आयोजनाबाट राप्ती नदीको पानी पश्चिमी मूल नहर र पू्र्वी नहरबाट  खेतमा पुगेको छ ।

खेतमा सिंचित हुन थालेसँगै अहिले समयमै धानखेती गर्न पाउँदा  किसानहरु हर्षित भएका छन् । धान रोपाइँलाई ध्यानमा राखी सिक्टा सिंचाइ आयोजनाको पानी पश्चिमीमूल नहर अन्तर्गत रहेको सिधनिया, डुडुवा र जेठी नाला शाखाबाट १५ हजार हेक्टर र पू्र्वी नहरको साविक राजकुलोबाट विभिन्न शाखा तथा प्रशाखाबाट १ हजार हेक्टर गरी कुल १६ हजार हेक्टर जमिनलाई १२ महिना सहजै सिंचाइ दिन सकिने आयोजना निर्देशक लोकबहादुर थापाले बताए ।

सिक्टा सिँचाइ आयोजनाको कुल बजेट २५ अर्ब रूपैयाँ रहेकोमा १४ अर्ब रूपैयाँ थप बढाएर पाँच वर्षभित्र काम सक्ने गरी ३९ अर्ब रूपैयाँको संशोधित गुरुयोजना बनाइएको छ भने पूर्वी र पश्चिमी मुख्य नहरसँगै शाखा, उपशाखा र प्रशाखा नहरसहित दुई वर्षमा सिंचाइको मुख्यमुख्य सञ्जाल बनिसक्ने आयोजना निर्देशक थापाले जानकारी दिए ।