अखबार नेपाल ट्रेन्डिङ

काठमाडौं: गण्डकी प्रदेशका स्याङ्जा र नवलपरासी (सुस्ता पूर्व) मा थप २० जनामा कोरोना संक्रमण पुष्टि भएको स्वास्थ्य निर्देशनालयल, गण्डकी प्रदेशले जनाएको छ । निर्देशनालयका अनुसार स्याङ्जामा १२ र नवलपरासीमा ८ जना संक्रमित थपिएका हुन् । यो सँगै गण्डकी प्रदेशमा कोरोना संक्रमितको संख्या ५ सय ४० पुगेको छ ।

भारतबाट फर्किएर सम्बन्धित स्थानीय तहका क्वारिन्टनमा बसेका उनीहमा कोरोना पुष्टि भएसँगै सम्बन्धित जिल्लामा रहेका आईसोलेसन कक्षमा लैजाने तयारी भइरहेको निर्देशनालयले जनाएको छ ।

यसैबीच सुदूरपश्चिम प्रदेशमा थप ७६ जनामा कोरोना संक्रमण पुष्टि भएसँगै संक्रमितको संख्या ८ सय ६५ पुगेको छ । आइतबार राष्ट्रिय जनस्वास्थ्य प्रयोगशाला काठमाडौंमा गरिएको परीक्षणबाट थप ३३ र सेती प्रादेशिक अस्पतालको प्रयोगशालाबाट गरिएको परीक्षणबाट ४३ जनामा पुष्टि भएको हो ।

पुष्टि भएका मध्ये कैलालीका २४ पुरुष र ८ महिला, कञ्चनपुरका २ पुरुष र १ महिला, बैतडी २ पुरुष, डडेल्धुराका १३ पुरुष र ३ महिला रहेका छन् । त्यसैगरी डोटीका १८ पुरुष र ३ महिला, बाजुराका १ परुष र १ महिलामा संक्रमण पुष्टि भएको सामाजिक विकास मन्त्रालय अन्तरगत स्वास्थ्य निर्देशनालय डोटीले हरेक दिन गर्ने मिडिया व्रिफिङ्गमा सो कुराको जानकारी दिएको हो । पोजिटभ देखिएका संक्रमितको विभिन्न अस्पतालमा उपचार भइरहेको छ ।

यो प्रदेशमा हालसम्म १० हजार ७ सय २३ जनाको पिसिआर बिधिबाट जाँच गरिएका मध्ये ९ हजार ७ सय १६ जनाको नेगेटिभ आएको सामाजिक विकास मन्त्रालयका स्वास्थ्य महाशाखा प्रमुख नरेन्द्रसिंह कार्कीले जानकारी दिए । हालसम्म अछाममा ६०, बैतडीमा १ सय ४१, बझाङ्गमा १८, बाजुरामा ७१, डडेल्धुरामा १ सय ८६, दार्चुलामा १२, डोटीमा १ सय ५०, कैलालीमा २ सय ६८, कञ्चनपुर ९९ गरी कूल १ हजार ७ जना संक्रमित फेला परेका छन् ।

आरडिटी बिधिबाट ९२ हजनर ४ सय २६ जनामा परीक्षण गरिएको छ । क्वारेन्टिनमा २६ हजार ८ सय १५ पुरुष र ६ हजार ३ सय ७७ जना महिला रहेका छन् । प्रदेशका विभिन्न आईसोलेसनमा शंकास्पद ४२ र संक्रमित १ सय ६ गरी १ सय ४८ जनाको उपचार भइरहेको छ । ४ सय ८७ जना भने सामान्य उपचार पछि घर गइसकेका छन् । सेती प्रादेशिक अस्पताल धनगढीमा ११, टिकापुरमा २६, महाकालीमा १८, अछाममा १०, बाजुरामा २, डडेल्धुरामा ७ र मालाखेती अस्पतालमा २० जना संक्रमितको उपचार भइरहेको छ ।