अखबार नेपाल ट्रेन्डिङ

काठमाडौं: अनिवार्य उपस्थित हुन नेकपाले गरेको ह्विपका बाबजुद पनि संसदीय सुनुवाई समितिको हिजोको बैठक कोरम नपुगेर स्थगित भएको छ ।

समितिमा बहुमत भएको सत्तारुढ नेकपाले आफ्ना सांसदलाई अनिवार्य उपस्थितिका लागि ह्विप जारी गरेको थियो । तर हिजो दिउँसो २ बजेका लागि बोलाइएको संसदीय सुनुवाई विशेष समितिको बैठक कोरम नपुगेर अन्तिम समयमा स्थगित हुन पुग्यो ।

संसदिय सुनुवाइ समितिको बैठकमा कोरम पुग्न ८ जना सदस्य अनिवार्य उपस्थित हुनुपर्ने प्राबधान छ । प्रतिपक्षी दलको बिरोध भइरहेको समयमा सत्तापक्षकै सांसद अनुपस्थित भएपछि सुनुवाई समिति झनै अलमलिएको छ ।

मधेशी आयोगका प्रस्तावित अध्यक्ष डा. विजयकुमार दत्त र थारु आयोगका प्रस्तावित अध्यक्ष विष्णुप्रसाद चौंधरीको सुनुवाईका लागि बोलाइएको समितिको आईतबारको बैठक पनि कोरम नपुगेकै कारण स्थगित भएको थियो ।

प्रमुख प्रतिपक्ष नेपाली काँग्रेसका ४ जना सांसदहरुले भने प्रतिपक्ष दलका नेता शेरबहादुर देउवाको अनुपस्थितिमा संवैधानिक परिषदले बिभिन्न आयोगहरुको पदाधिकारी सिफारिस गरेकोमा असन्तुष्टि जनाउँदै बैठक बहिष्कार गर्दै आएका छन् ।