‘हनी ट्रयाप’मा फसाई रकम असुल्ने दुई महिला पक्राउ
वि.सं.२०७७ चैत ५ बिहीवार १७:३३
काठमाडौं: ‘हनी ट्रयाप’मा फसाई रकम असुल्ने कार्यमा संलग्न दुई महिलालाई प्रहरीले पक्राउ गरेको छ ।
बलात्कारको झुठो आरोपमा दोषी ठहर गर्दै सुर्खेत जिल्ला अदालतबाट साढे तीन वर्षको जेल सजाय सुनाइएकी ललिता भन्ने लालसरी शाही र कल्पना हमाललाई प्रहरीले पक्राउ गरेको हो ।
काठमाडौं महानगरपालिका-३२, कोटेश्वर बस्ने पुरुषलाई सुन्धारास्थित गेष्ट हाउसमा भेट्न बोलाई कोठमासँगै बसेको र सँगै बसेको भिडियो गोप्य रुपमा रेकर्ड गरी म्यासेन्जरमार्फत पीडितलाई पठाएर ‘ब्ल्याकमेलिङ’ गरी पटक पटक आईएमई मार्फत लाखौँ रकम असुलेको आरोपमा उनीहरु पक्राउ परेका प्रहरीले जनाएको छ ।
महानगरीय प्रहरी अपराध महाशाखाको विशेष टोलीले काठमाडौंको विभिन्न स्थानबाट उनीहरुलाई यही चैत ४ गते (बुधबार) पक्राउ गरेको हो ।
प्रारम्भिक अुनसन्धान पश्चात थप अनुसन्धानका लागि महानगरीय प्रहरी परिसर, काठमाडौं पठाइएको छ ।
सुर्खेत जिल्ला विरेन्द्रनगर-१० स्थायी ठेगाना भएकी ३७ वर्षीया शाही काठमाडौं, घट्टेकुलोमा बस्दै आएकी थिइन् भने सोही स्थायी ठेगाना भएकी ३७ वर्षीया हमाल भने कपनमा बस्दै आएकी थिइन् ।
लालसरी शाही २०६६ मंसिरमा राजु धिताललाई अपहरण गरी कर्तव्य गरेको घटनामा बाँके जिल्ला अदालतले १४ जेल सजाय सुनाइएकी अभियुक्त हुन् ।
सात वर्ष जेल बसेर २०७४ साल मंसिर २२ गते एक लाख रुपैयाँमा धरौटीमा छुटेकी थिइन् ।
यस्तै, शाही र हमाल दुवैले विरेन्द्रनगर नगरपालिकाका लेखा शाखामा कार्यरत लेखापाल खेमराज शर्मालाई फसाउने नियतले होटलमा भेट्न बोलाई शर्माविरुद्ध गत असोज ६ गते बलात्कारको जाहेरी दिएका थिए ।
उक्त जाहेरीलाई झुठो ठहर गर्दै लालसरीविरुद्ध सुर्खेत जिल्ला अदालतले साढे तीन वर्षको जेल सजाय सुनाएको थियो ।
गतल समाचार सम्प्रेषण गर्ने सञ्चारमाध्यमलाई प्रेस काउन्सिल नेपालले कारवाही गर्ने
वि.सं.२०७७ चैत ५ बिहीवार १७:३३