अखबार नेपाल ट्रेन्डिङ

रामेछापः रामेछापको उमाकुण्ड गाउँपालिकामा बिगत डेढ वर्षदेखि बन्द रहेको लाप्चानेस्थित ईलाका प्रशासन कार्यालयको सेवा प्रबाह आजबाट पुनः सुचारु भएको छ ।

उमाकुण्ड गाउँपालिका अध्यक्ष शेरबहादुर सुनुवारको निरन्तर पहलपछि असोज २७ गते आजबाट ईलाका प्रशासन कार्यलयबाट नेपाली नागरिकताको प्रमाणपत्र बितरणको काम शुरु भएको हो ।

बन्द रहेको ईलाका प्रशासन कार्यालय पुनः सञ्चालनमा आएसँगै उमाकुण्ड गाउँपालिकाका स्थानीय नागरिकहरुमा खुशियाली छाएको छ । यसअघि यहाँका आम नागरिकले नागरिकता बनाउनका लागि घण्टौ धाएर सदरमुकाम मन्थली जानुपर्ने बाध्यता थियो ।

इलाका प्रशासन कार्यालयमा एक जना अधिकृत, दुई जना नायक सुब्बा, एक जना सहायक कम्प्युटर प्राविधिक र दुई जना कार्यालय सहयोगीको दरबन्दी रहेको छ । कार्यालय सञ्चालमा आएपछि उमाकुण्ड गाउँपालिकाका बासिन्दालाई अब नागरिकता लगायतको सेवा लिनको लागि सदरमुकाम मन्थली धाउन पर्ने बाध्यता हटेको छ ।

ईलाका प्रशासन कार्यालय लाप्चानेबाट जिल्लाका उत्तरपूर्वका तत्कालिन प्रीति, भूजी, गुप्तेश्वर, चुचुरे, गुम्देल, कुँभुकास्थली, ठोसे र बाम्तीका नागरिकहरुले सेवा लिन पाउने छन् ।

तस्बीरः उमाकुण्ड गाउँपालिका अध्यक्ष शेरबहादुर सुनुवारको फेसबुकबाट