अखबार नेपाल ट्रेन्डिङ

काठमाडौं: शिक्षा मन्त्रालयले चैत्र मसान्तमा नै शैक्षिक सत्र सम्पन्न गर्ने गरी संश्लेषण सहितको पाठ्यक्रम सार्वजनिक गरेको छ ।

कोरोना भाइरस महामारीका कारण पठन-पाठन ठप्प भएपछि मन्त्रालयले वैकल्पिक सिकाई प्रणालीलाई मान्यता दिँदै आगामी सात महिना शैक्षिक सत्र पुरा गर्ने गरी पाठ्यक्रम तयार पारेको हो ।

अनलानईन, रेडियो तथा टेलिभिजनबाट कक्षा सञ्चालन गरेपनि प्रभावकारी नभएपछि मन्त्रालयले विद्यार्थीलाई निःशुल्क इन्टरनेट उपलब्ध गराउने तयारी सुरु गरेको छ भने पठन पाठन सहज गराउन पाठ्यक्रमलाई दुई भागमा विभाजन गरेको छ ।

विद्यार्थी आफैले पढेर बुझ्न सक्ने नबुझेको शिक्षकलाई सोध्न सक्ने र घरमा पढेर अभिभावकको सहयोग लिन सक्ने गरी पाठ्यक्रम तयार पारिएको छ ।

गत चैत्र ६ गते परीक्षा सकेर घरमा नै रहेका करिव ४० लाख विद्यार्थीको शैक्षिक सत्र नै गुम्ने हो कि भन्ने डर भईरहेका बेला मन्त्रालयले पाठ्यक्रम संश्लेषण गरेसँगै यो चिन्ता भने हटेको छ ।

तर दूरदराजसम्म इन्टरनेट नपुगेको तथा अभिभावकले समय दिन नसक्ने बालबालिकाका लागि भने पठन पाठनमा अझै चुनौति थपेको छ ।