उपत्यकामा थपिए अहिलेसम्मकै सबैभन्दा धेरै ६७६ कोरोना संक्रमित, नेपालमा कोरोना संक्रमितको संख्या ५६,७८८ पुग्यो
वि.सं.२०७७ भदौ ३० मंगलवार १७:१५
काठमाडौं: उपत्यकामा पछिल्लो २४ घण्टामा थप ६ सय ७६ जनामा कोरोना संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार काठमाडौंमा ५ सय ५५, ललितपुरमा ३५ र भक्तपुरमा ८६ जना गरी जम्मा ६ सय ७६ जना संक्रमित थपिएका छन् ।
नेपालमा पछिल्लो २४ घण्टामा थप १ हजार ४ सय ५९ जनामा कोरोना भाइरसको संक्रमण पुष्टि भएको छ । यो सँगै कोरोना संक्रमितको संख्या ५६ हजार ७ सय ८८ पुगेको छ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले मंगलबार नियमित पत्रकार सम्मेलन मार्फत जानकारी दिएका हुन् ।
पछिल्लो २४ घण्टामा थप १ हजार ६२ जना कोरोना संक्रमणमुक्त भएका छन् । योसँगै नेपालमा कोरोना संक्रमण भएर निको हुनेको संख्या हालसम्म ४० हजार ६ सय ३८ पुगेको छ ।
मन्त्रालयका अनुसार आज थप ११ जनाको कोरोनाका कारण मृत्यु भएको छ । योसँगै कोरोनाले ज्यान गुमाउनेको संख्या ३ सय ७१ पुगेको छ ।
वि.सं.२०७७ भदौ ३० मंगलवार १७:१५