अखबार नेपाल ट्रेन्डिङ

काठमाडौं: सरकारले योगदान पुर्याएका आधारमा सम्मान गर्न वितरण गरिने विभुषण जति पनि बाँड्न मिल्ने गरी नियमावली संशोधन गरेको छ ।

सरकारले विभुषण (दोस्रो संशोधन) नियमावली २०७७ लाई स्वीकृत गरेको हो ।

मंगलबार बसेको मन्त्रिपरिषद बैठकले विभुषण नियमावली २०७७ को मस्यौदालाई स्वीकृत गरेसँगै जतिपनि विभुषण बाँड्न मिल्ने भएको हो ।

सरकारी तक्मा बाँड्नलाई निश्चित संख्या तोक्न कानुनमा संशोधन गर्ने तयारी भइरहेको बेला सरकारले कुनै पनि संख्या नतोकि तजविजको आधारमा जति पनि दिन मिल्ने गरी नियमावली स्वीकृति गरेको हो ।

राष्ट्रिय अन्तर्राष्ट्रिय रुपमा योगदान गरेका व्यक्तिलाई दिनुपर्ने तक्मा आफ्न्त, नातागोतालाई दिन थालेपछि लोकतन्त्र स्थापना भएपछिका सरकारले वितरण गरेका तक्मा विवादरहित हुन सकेका छैन ।

कतिपय अवस्थामा त कालोबजारी गरेकालाई समेत राज्यले तक्मा बाँडेका घटना सार्वजनिक भएका थिए ।

राज्यले दिने सम्मानको दुरुपयोग भएको र त्यसको प्रभावकारीता पनि नभएको गुनासो आउन थालेपछि यसअघि गृहमन्त्रालयले यस्ता पदक दुई सय भन्दा बढीलाई दिन नपाउने गरी नियमावली बनाएको थियो ।

गृह मन्त्रालयले यो वर्षका लागि भन्दै यसअघि कै संख्या जति नै तक्मा बाँड्न मिल्ने गरी नियमावली संशोधन गर्न स्वीकृतिका लागि मन्त्रिपरिषदमा पेश गरेको थियो ।

उक्त प्रस्तावलाई मंगलबार बसेको मन्त्रिपरिषद बैठकले स्वीकृति गरेको हो ।