अखबार नेपाल ट्रेन्डिङ

काठमाडौं: नेपाल कम्युनिष्ट पार्टी नेकपामा चर्किएको विवादकाबीच दुई समुहहरु आ-आफ्नो रणनीति बनाउन सक्रिय भएका छन् । बुधबार बिहान प्रधानमन्त्री तथा पार्टी अध्यक्ष केपी ओलीले बालुवाटारमा आफू निकटका नेताहरुसँग छलफल गरे भने साँझ ललितपुरको झम्सिखेलमा ओली इतर समूहको बैठक भयो ।

बैठकपछि सञ्चारकर्मीहरुसँग कुरा गर्दै स्थायी कमिटी सदस्य भीम रावलले बैठकमा केही मन्त्रीसहित करिब ३० जना सहभागी भएको जानकारी दिए । बैठकमा नेकपा अध्यक्ष पुष्पकमल दाहाल, वरिष्ठ नेता झलनाथ खनाल, माधवकुमार नेपाल, नारायणकाजी श्रेष्ठ, रामबहादुर थापा समेत उपस्थित थियो । यस्तै केही मन्त्रीहरु पनि बैठकमा सहभागी रहेको र बैठकले बिहीबार बस्ने स्थायी कमिटीमा कसरी प्रस्तुत हुने भन्ने रणनीति बनाएको रावलले जानकारी दिए ।

बैठकबारे जानकारी दिँदै रावलले भने, ‘बिहान अध्यक्ष तथा प्रधानमन्त्री ओलीले केही नेताहरुसँग छलफल गर्नुभयो, अहिले अर्को अध्यक्षले बिहानको बैठकमा सहभागी साथीहरुलाई बोलाएर के कसो हो भनेर जानकारी लिनुभएको हो ।’ उनले बैठकमा भएको निश्कर्षबारे भने केही जानकारी दिएनन् । अब कसरी अगाडि बढ्नुहुन्छ भन्ने प्रश्नमा रावलले भने, ‘भोली बैठकमै सबैकुरा हुन्छ, अहिले त के भन्न सकिन्छ र ?’

नेकपाको स्थायी कमिटी बैठकमा प्रचण्ड–माधव समूहले ओलीलाई प्रधानमन्त्री तथा पार्टी अध्यक्ष दुबै पदबाट राजीनामा गर्न माग गरेको छ । प्रचण्ड–माधव समूह एकजुट हुँदा ओली पार्टीको सचिवलाय र स्थायी कमिटीमा समेत अल्पमतमा परेका छन् । नेकपाको हालको विधानमा बुहमतका आधारमा निर्णय गरेर पार्टी अध्यक्षलाई हटाउन सकिने कल्पना भने गरिएको छैन । तत्कालीन एमाले र माओवादीबीच पार्टी एकता भएर बनेको नेकपामा महाधिवेशनसम्म दुई अध्यक्षले पार्टी चलाउने व्यवस्था छ ।