अखबार नेपाल ट्रेन्डिङ

रामेछापः रामेछाप जिल्ला उमाकुण्ड गाउँपालिका आसपासमा विगत एक साता देखि परेको अविरल वर्षाका कारण नेपाल टेलिकमको टावरमा समस्या हुँदा स्थानीयहरु मार्कामा परेका छन् । विगत तीन दिनदेखि ईन्टरनेट तथा फोन सेवा अवद्ध हुँदा त्यस क्षेत्रको जनजिवन प्रभावित बनेको छ ।

गाउँपालिकाको वडा नम्बर २ बाम्तीभण्डारको साविक वडा नम्बर २ देउरालीमा राखिएको नेपाल टेलिकमको टावरको ब्याकपमा समस्या आउँदा तीन दिनदेखि स्थानीयहरु सुचनाको पहुँचबाट बञ्चित भएका छन् । त्यस क्षेत्रमा ५ दिनदेखि प्रशारण लाईनको बत्ति नहुँदा ब्याकपको चार्ज पनि सकिएकोले सेवा अबद्ध भएको स्थानीयले जानकारी दिएका छन् ।

यसैगरी सो क्षेत्रमा निजी क्षेत्रबाट सञ्चालित सेवा प्रदायक कम्पनी एनसेलको टावरमा पनि समस्या आएको छ । सो क्षेत्रमा वर्षा याम सुरु भएयता वर्षौदिखि उही समस्या दोहोरिने गरेको छ । तर समस्या न्यूनिकरणका लागि सम्बन्धित निकायले ध्यान नदिँदा आम नागरिकलाई समस्या परेको छ ।

टेलिफोनले सेवा अबद्ध हुँदा छिमेकी जिल्ला ओखलढुङगा, सोलुखुम्बु, दोलखा लगायत आसपासका जिल्लाबासी समेत प्रभावित बनेका छन् । समस्या समाधानका लागि गाउँपालिकामा सम्पर्क गर्न खोज्दा सम्पर्क हुन नसकेको स्थानीयको गुनासो छ ।