अखबार नेपाल ट्रेन्डिङ

काठमाडौं: नेपाल सरकारले कोरोना भाइरसको संक्रमण नियन्त्रणका लागि पछिल्लो पटक वैशाख २५ गतेसम्म बढाइएको लकडाउनको समय अवधि थप गर्ने तयारी गरेको छ । गृह मन्त्रालय स्रोतका अनुसार आगामी जेठ १० गतेसम्म लकडाउन बढाउनका लागि सिफारिस गर्ने तयारी भइरहेको जानकारी दिएको छ ।

गृहमन्त्रालय स्रोतका अनुसार कोरोना संक्रमण रोकथाम तथा नियन्त्रण उच्चस्तरीय समितिको बैठक बस्ने जनाएको छ । समितिको यसअघिको बैठकमा भएको छलफलका अनुसार गृह मन्त्रालयले लकडाउनको प्रभावकारिता र अपरिहार्यताका विषयमा अध्ययन गरिरहेको बताएको छ ।

पछिल्लो समय बाँकेमा कोरोना संक्रमण बढेपछि लकडाउनलाई थप कडाइका साथ कार्यान्वयन गर्ने गरी समय अवधि थप गर्ने तयारी भइरहेको गृह मन्त्रालय स्रोतले बताएको छ । प्रधानमन्त्री तथा मन्त्रिपरिषदको कार्यालयका अनुसार आइतबार बसेको मन्त्रिपरिषद बैठकमा समेत लकडाउनका विषयमा छलफल भएको बुझिकए छ । छलफलका क्रममा प्रधानमन्त्री केपी शर्मा ओलीले लकडाउनलाई थप कडाइका साथ कार्यान्वयन गराउन गृहमन्त्री रामबहादुर थापालाई निर्देशन दिएका थिए ।

प्रधानमन्त्रीको निर्देशन पछि गृहमन्त्री थापाले पनि कोरोना संक्रमण बढ्न नदिन लकडाउन नै प्रभावकारी विकल्प भएको र त्यसलाई कडाइका साथ पालना गरिने जनाएका थिए । नेपालमा कोरोना भाइरसको दोस्रो संक्रमित देखिएपछि सरकारले ११ चैतदेखि लकडाउनको आदेश जारी गरेको थियो । यसबीचमा नेपालमा कोरोना भाइरसबाट संक्रमित हुनेको संख्या बढेर ७५ पुगेको छ । कोरोना संक्रमण देखिएका १६ जना उपचार पछि निको भएर घर फर्किएकामा २ जनामा पुन: स्वास्थ्य समस्या देखिएपछि अस्पताल भर्ना गरिएको छ ।