अखबार नेपाल ट्रेन्डिङ

जाजरकोट: केही दिन अघि वडा अध्यक्षले बाँधेर कुटपिट गरेको भिडियोले सामाजिक सञ्जाल तताएको थियो ।

डोरीले बाँधेर कुटपिट गरेका जाजरकोटको जुनीचाँदे गाउँपालिका-२ का वडाध्यक्ष रामबहादुर नेपालीले ।

गाउँमै कागज बनाएर मिलापत्र गरेपनि त्यो कुरा बाहिर आएपछि त्यसले उग्रता लिन पुग्यो । त्यसपछि वडा अध्यक्षलाई पक्राउ गर्नुपर्ने माग उठ्यो ।

चारैतिरबाट दबाब आएपछि आज उनलाई प्रहरीले  पक्राउ गरेको छ ।  पक्राउ परेका वडाध्यक्ष नेपालीलाई सदरमुकामतर्फ ल्याउने काम भइरहेको निमित्त जिल्ला प्रहरी प्रमुख खुमानन्द पाण्डेले बताएका छन् ।

घटनास्थल सदरमुकामबाट करिब ८० किलोमिटर टाढा भएकाले सदरमुकाम पुग्न केही समय लाग्ने पाण्डेले बताए ।

गत साउन १५ गते वडा कार्यालयमा सामाजिक सुरक्षा भत्ता बाँड्ने क्रममा भ्रष्टाचार गर्न पाइदैन भन्दै जाँड खाएर होहल्ला गरेको भन्दै वडाध्यक्ष नेपालीले सोही ठाउँका सर्पे दमाईलाई डोरीले बाँधेर कुटपिट गरेका थिए ।

सामाजिक सुरक्षा भत्ता अनियमितताको आरोप लगाएपछि वडाध्यक्ष नेपालीले सर्पेलाई बाँधेर कुटपिट गरेको प्रत्यक्षदर्शीले बताएका छन् ।

उक्त घटनालाई गाउँमै मिलाउन खोजेको प्रहरीले मिडिया र अधिकारकर्मीको चर्को दबाव थेग्न नसकेपछि बल्ल आज बिहीबार पक्राउ गरेको हो ।

पीडित सर्पे दमाईलाई पनि जाहेरी दिन लगाउने र घटनाबारे बुझ्नन सदरमुकाम बोलाइएको बताईएको छ ।