अखबार नेपाल ट्रेन्डिङ

काठमाडौं: २०२९ साल फागुन २१ गते पाँचजना क्रान्तिकारी युवालाई तत्कालीन पञ्चायती शासकले झापा इलामको सीमावर्ती सुखानीमा एकै ठाउँमा गोली हानेर मारेको सम्झनामा हरेक वर्ष सुखानी सहिद स्मृति दिवस मनाउने गरिएको छ ।

शहीदको सम्झना गर्न झापाको सुखानी पुगेका नेकपाका दुवै अध्यक्षले पार्टी एकता र सरकार कमजोर पार्न भैरहेका गतिविधिप्रति आफूहरु सचेत रहेको बताए ।

पञ्चायती शासनविरुद्ध सुरु भएको विद्रोहका क्रममा तत्कालीन सरकारले झापाबाट इलाम जेल सार्ने बहानामा रामनाथ दाहाल, नेत्र घिमिरे, कृष्ण कुइकेल, बीरेन राजवंशी र नारायण श्रेष्ठलाई सुखानीमा लगेर मारेको थियो । यो वर्ष भने दिवस मनाउन सत्तारुढ नेकपाका दुवै अध्यक्ष केपी ‌ओली र पुष्पकमल दाहाल सुखानी पुगे ।

क्रान्तिकारी योद्दाले सहादत प्राप्त गरेको स्थल सुखानीमा सहिदकै सङ्ख्यामा पाँचवटा रुख संरक्षित छन् । त्यसलाई सुखानी पार्क भन्ने गरिएको छ । प्रधानमन्त्री ओलीले सहिदको सपना पूरा हुन नदिने गरी पार्टी एकता विथोल्ने र सरकारलाई कमजोर बनाउन भइरहेका प्रयासप्रति आफू सचेत रहेको बताए ।

एमाले र माओवादी केन्द्रबीच एकता भएपछि शीर्ष दुई नेता पहिलो पटक सुखानीमा पुगेका हुन् । नेकपाका अर्का अध्यक्ष पुष्पकमल दाहालले सुखानी र जनयुद्धका सहीदलाई एकीकृत नगरे नेपालको कम्युनिष्ट आन्दोलन निर्णायक तहमा नपुग्ने आफ्नो पूर्ववत निष्कर्ष सार्थक सावित भएको दावी गरे । पार्टी एकता भाँड्न भैरहेका प्रयासबारे सचेत रहेको बताउँदै उनले शहीदको सपना साकार पार्न कम्युनिष्ट आन्दोलनको एकता बाहेक पदीय हिसावले आफूलाई कुनै लोभ नभएको दावी गरे ।

नेपालका कम्युनिष्टका लागि फागुन २१ राजनीतिक क्रान्तिको सुत्रपात भएको दिनको स्मरण पनि हो । त्यो दिन बगेको रगतले नेपाली कम्युनिष्ट आन्दोलनलाई नयाँ उचाइमा पुर्याउन ठूलो भूमिका खेलेको मानिन्छ ।।