अखबार नेपाल ट्रेन्डिङ

काठमाडौं: गत चैत २० गतेदेखि सुरु भएको शिक्षक आन्दोलन आज २८औँ दिनपनि जारी छ । शिक्षा ऐन तथा पुराना सम्झौता कार्यान्वयन गर्न माग राख्दै शिक्षकहरू आन्दोलनमा उत्रिएका हुन् । उनीहरुले संघीय संसदबाट ऐन पारित नभएसम्म आन्दोलन नरोकिने भन्दै आज पनि नयाँ बानेश्वरस्थित निषेधित क्षेत्र नजिक प्रदर्शन गरेका थिए ।

आन्दोलनतर शिक्षकहरुले शिक्षा ऐन खोज्दै विभिन्न नारा समेत लगाएका थिए । उनीहरुको ‘साह्रै दुःख पाइयो, शिक्षा ऐन चाहियो’, ‘अग्रगामी शिक्षा ऐन दिलाइदे, हामीलाई स्कुल पठाइदे,’ ‘हामी सडक छोड्दैनौं, शिक्षा ऐन नआए । हामी मर्न तयार छौँ, शिक्षा ऐन नआए’, ‘ओइ सरकार ओइ, शिक्षा ऐन खोइ ?’ लगायतका नारा लगाएर शिक्षकहरु सडकमा नाचगान सहित फोटो खिचाउनमा समेत व्यास्त देखिन्थे ।

हिजो सोमबार राति सरकारसँग भएको वार्तामा सहमति नजुटेपछि बिहानै सामाजिक सञ्जाल मार्फत नेपाल शिक्षक महासंघका अध्यक्ष लक्ष्मीकिशोर सुवेदीले शिक्षक आन्दोलन थप बलियो बनाउन शिक्षकहरूलाई आग्रह गरेका थिए । सिंहदरबारमा भएको वार्तापछि शिक्षामन्त्री रघुजी पन्तले वार्ता निष्कर्ष नजिक पुगेको दाबी गरेपनि महासंघका अध्यक्ष सुवेदीले भने केही विषयमा छलफल भएपनि धेरै विषयमा छलफल बाँकी रहेको बताएका थिए । सरकारको तर्फबाट वार्ताको नेतृत्व शिक्षामन्त्री पन्तले गरेका थिए भने महासंघको तर्फबाट अध्यक्ष सुवेदीसहितको टोलीले गरेको थियो ।

तस्बीरहरुः सुबास मुखिया सुनुवार