अखबार नेपाल ट्रेन्डिङ

काठमाडौं: नेपाल शिक्षक महासंघका अध्यक्ष लक्ष्मीकिशोर सुवेदीले शिक्षक आन्दोलन थप बलियो बनाउन शिक्षकहरूलाई आग्रह गरेका छन् । सोमबार राति सरकारसँग भएको वार्तामा सहमति नजुटेपछि बिहानै सामाजिक सञ्जालमा उनले यस्तो आग्रह गरेका हुन् ।

‘आन्दोलन बिना केही पाइँदैन’, उनले लेखेका छन्, ‘त्यसैले आन्दोलन बलियो गराऔँ ।’ उनले मंगलबार पनि बिहान ठिक  ११ बजे माइतीघर मण्डला आइपुग्न उनले शिक्षकहरूलाई अपिल समेत गरेका छन् ।

सोमबार राति सिंहदरबारमा भएको वार्तापछि शिक्षामन्त्री रघुजी पन्तले निष्कर्षनजिक पुगेको दाबी गरेका थिए । महासंघका अध्यक्ष सुवेदीले भने केही विषयमा छलफल भएपनि धेरै विषयमा छलफल बाँकी रहेको बताएका थिए । सरकारको तर्फबाट वार्ताको नेतृत्व शिक्षामन्त्री पन्तले गरेका थिए भने महासंघको तर्फबाट अध्यक्ष सुवेदीसहितको टोलीले गरेको थियो ।

मन्त्रिपरिषद्को सोमबारको बैठकले शिक्षक महासङ्घसँग वार्ता लगायत विषयमा सहमति गर्न शिक्षामन्त्री पन्तलाई जिम्मेवारी दिएको थियो । मन्त्रिपरिषद्को बैठकपछि सरकारका प्रवक्ता एवं सञ्चार तथा सूचना प्रविधिमन्त्री पृथ्वी सुब्बा गुरुङले बुधबारसम्म शिक्षक आन्दोलनको माग सम्बोधन हुने बताएका थिए ।

विद्यालय शिक्षा ऐनलगायत माग राखी शिक्षकहरूले गत चैत २० गतेदेखि राजधानी काठमाडौँ केन्द्रित आन्दोलन गर्दै आएका छन् ।