अखबार नेपाल ट्रेन्डिङ

रामेछाप: उमाकुण्ड गाउँपालिकाको वडास्तरीय अनिवार्य तथा नि:शुल्क शिक्षा घोषणा कार्यक्रम अन्तर्गत वडा नम्बर-३ कुबुकास्थलीमा सम्पन्न भएको छ । उमाकुण्ड वडा नम्बर ३ द्वारा आयोजित वडा अध्यक्ष गुण बहादुर थापाको अध्यक्षतामा कार्यक्रम सम्पन्न भएको हो ।

गाउँपालिका अध्यक्ष शेर बहादुर सुनुवारको प्रमुख आतिथ्यमा सम्पन्न कार्यक्रममा विशिष्ट अतिथि पालिकाका शिक्षा शाखा प्रमुख ङावा शेर्पा लगायत विभिन्न विद्यालयका विद्यालय व्यवस्थापन समितिका अध्यक्ष तथा विद्यालयका प्रतिनिधिहरुको उपस्थिति थियो ।

कार्यक्रममा शिक्षाबाट बञ्चित ३ बालबालिका  रिदम शेर्पा, अनिसा सुनुवार र भगवती महत विद्यालयमा भर्ना भएका छन् । भर्नाका लागि वडा अध्यक्ष गुण बहादुर थापा गाउँपालिका अध्यक्ष शेर बहादुर सुनुवार र शिक्षा शाखा प्रमुख ङावा शेर्पाले नयाँ भर्ना भएका विद्यार्थीलाई झोला कापी र कलम दिएर स्वागत गरेका थिए ।

कार्यक्रममा प्रमुख अतिथि शेर बहादुर सुनुवारले बालबालिका भविष्यका कर्णधार हुन त्यसैले कुनै बालबालिका शिक्षाबाट बञ्चित हुन नहुने बताए । त्यस्तै विशिष्ट अतिथि ङावा शेर्पाले पालिकाभित्र रहेका बालबालिकालाई विद्यालयमा ल्याउन पालिकाबाट सक्दो पहल गरिएको बताए । गरिब बालबालिकाहरु शिक्षाबाट बञ्चित नहोउन् भनि स्थानीय सरकारले पहल गरिरहेको बताए ।

त्यसैगरी उमाकुण्ड गाउँपलिका ३ का वडा अध्यक्ष गुण बहादुर थापाले पालिका बाहिर रहेका बालबालिकाहरुलाई पनि विद्यालयमा ल्याएर भर्ना गर्न आफुले भुमिका खेलिरहेको बताए ।