अखबार नेपाल ट्रेन्डिङ

काठमाडौं: परमेश्वर मण्डली विश्व सुसमाचार समाजद्वारा आयोजित ´निस्तार चाडको प्रेम जीवन बचाउने प्रेम` भन्ने मुल नाराका साथ १३६५औं विश्वव्यापी रक्तदान अभियान कार्यक्रम काठमाडौंको गोकर्णमा सम्पन्न भएको छ ।

गोकर्णेश्वर नगरपालिकाका नगर प्रमुख दिपक रिसालको प्रमुख आतिथ्यता, गोकर्णेश्वर नगरपालिकाका वडा नं ४ का वडा अध्यक्ष जयराम महत, वडा नं ३ का अध्यक्ष मुरारी कुइकेल, ब्लोडन नेपालका अध्यक्ष बालकृष्ण श्रेष्ठको विशिष्ट आतिथ्यता तथा अतिथिहरुको उपस्थिति रहेको सो कार्यक्रमको सभापतित्व परमेश्वर मण्डली विश्व सुसमाचारका अध्यक्ष तेजेन्द्र गौतमले गरेका थिए ।

पर्मेश्वर मण्डली विश्व सुसमाचार समाज गोकर्णको आयोजना र नेपाल मेडिकल कलेज रक्तसंचार केन्द्र जोरपाटीको समन्वयमा आयोजित कार्यक्रममा १५० जनाले रक्तदान गरेका थिए । रक्तदान कार्यक्रममा बोल्दै प्रमुख अतिथि गोकर्णेश्वर नगरपालिकाका नगर प्रमुख दिपक रिसालले पर्मेश्वर मण्डलीले स्वास्थ्य, शिक्षा, बिपतमा गरेको सहयोग उदाहरणीय रहेको बताए । उनले भने- ‘राजनीतिकर्मीले गर्ने राजनीति पनि सेवा नै भएकोले हामी प्रत्येक मानवप्राणीले नै सेवाको भाव राख्न जरुरी छ ।’

कार्यक्रममा बोल्दै विशिष्ट अतिथि गोकर्णेश्वर नगरपालिकाका वडा नं ४ का वडा अध्यक्ष जयराम महतले हामी जहाँ भएपनि जुन धर्म भएपनि हामी नेपाली हौ । हाम्रो नेपालको संविधानले हामीलाई धार्मिक स्वतन्त्रता प्रदान गरेको छ । त्यो स्वतन्त्रताभित्र जात, धर्म, संस्कृति र परम्परा अनुसार हामीले हाम्रो कर्म गर्दै आएका छौ । त्यो कर्म गर्न सबैलाई छुट छ तर हामीले समाजमा खल्बलिने किसिमको गतिविधि गर्नु हुँदैन । यो संस्थाले मानव कल्याणको  निम्ति काम गर्दै आएकोले पनि हाम्रो यहाँहरुलाई सहयोग रहने बताए  ।

कार्यक्रमका सभापति तेजेन्द्र गौतमले हामीले विश्वव्यापी रूपमा मानवप्राणीको रक्षाका निम्ति रक्तदानलाई विशेष प्राथमिकता दिदै अहिले हाम्रो संस्थाले नेपालका ७७औं जिल्लामा बृहत रक्तदान कार्यक्रम आयोजना गर्दै आएको र हामी महा बिनाशकारी भुकम्प देखि देशमा हुने प्राकृतिक बिपत्तिमा गर्ने सहयोगसँगै शिक्षा एवम् स्वास्थ्यको क्षेत्रमा पनि पनि सक्रिय रुपमा काम गर्दै आएको र आगामी दिनमा पनि निरन्तरता दिने बताए ।

गोकर्णेश्वर नगरपालिकाका नगर प्रमुख दिपक रिसालले परमेश्वर मण्डली विश्व सुसमाचार समाजका सभापति तेजेन्द्र गौतमलाई सम्मान पत्र प्रदान गरेका थिए ।