अखबार नेपाल ट्रेन्डिङ

सिमरा: त्रिभुवन राजपथ अन्तर्गत पथलैया-हेटौंडा सडकखण्डमा बस र ट्रक ठोक्किँदा तीन जनाको मृत्यु भएको छ । दुर्घटनामा २७ जना घाइते भएका छन् भने ७ जनाको अवस्था गम्भीर छ ।

मृत्यु हुनेमा ट्रक चालक तनहुँ पिपरटारका करिब २८ वर्षीय पूर्ण गुरुङ, बस चालक हेटौंडा उपमहानगरपालिका-३ का करिब ४० वर्षीय हरि शमशेर थापा र पहिचान नखुलेका एक पुरुष रहेका छन् । काकरभिट्टाबाट काठमाडौंतर्फ जाँदै गरेको बा.३-००१ ख २५८७ नम्बरको बस र हेटौंडाबाट पथलैयातर्फ जाँदै गरेको ना७ख ७३०० नम्बरको ट्रक एक आपसमा ठोक्किँएको हो ।

जिल्ला प्रहरी कार्यालय बाराका अनुसार सुनसरी भाति गाउँपालिका-२ का ३० वर्षीय खिलराज दुलाल, सुनसरी इटहरी उपमहानगरपालिका-४ का ४० वर्षीय सुरेन्द्र गौतम, उनकी श्रीमती ३५ वर्षीया सम्झना गजुरेल उनकी छोरी १२ वर्षीया सोराय गौतम, उनका छोरा तीन वर्षीय सोडनेम गौतम, बसका सहचालक झापा दमकका ३५ वर्षीय नगेन्द्र उप्रेतीको अवस्था गम्भिर छ । उनीहरुलाई थप उपचारका लागि हेटौंडाबाट चितवनस्थित पुरानो मेडिकल कलेजमा लगिएको छ ।

यसैगरी दुर्घटनाका अर्का एक घाईते तनहुँ बन्दिपुर गाउँपालिका-६ का १७ वर्षीय तेजकुमार गुरुङको हेटौंडा अस्पतालमा उपचार भइरहेको बारा प्रहरीले जानकारी दिएको छ । दुर्घटनामा सामान्य घाइते भएका यात्रुको स्थानीय स्वास्थ्य संस्थामा उपचार भइरहेको प्रहरीले जनाएको छ । दुर्घटनापछि राजमार्गसमेत अवरुद्ध भएको थियो । प्रहरीले घाइतेको उद्धार गरी पठाएपछि राजमार्ग सूचारु गरेको छ ।