अखबार नेपाल ट्रेन्डिङ

काठमाडौं: काठमाडौंबाट पोखरा जाँदै गरेको यात्रुबाहक बस त्रिशूली नदीमा खस्दा ८ जनाको मृत्यु भएको छ । दुर्घटनामा मृत्यु हुनेमा ६ जना पुरुष र २ जना महिला रहेका छन् ।

प्रदेश ३–०१–००५ ख ९९५२ नम्बरको बस पृथ्वी राजमार्ग अन्तर्गत धादिङको गजुरी गाउँपालिका–१, छहरामा सडकबाट करिब ४० मिटर तल नदीमा खसेको हो ।

घटनास्थलमा अहिले उद्धार कार्य जारी छ । उद्धारमा नेपाली सेना, सशस्त्र, नेपाल प्रहरी र ट्राफिक प्रहरी खटिएका छन् । बसबाट ८ जनालाई उद्धार गरि नजिकको अस्पताल पठाइएको जिल्ला प्रहरी कार्यालय धादिङले जानकारी दिएको छ ।

प्रहरीका अनुसार बस अनियन्त्रित भएर सडकबाट खसेको थियो । बसका चालक सहचालक को हुन् र बसमा कति जना यात्रु थिए भन्ने बारे अहिलेसम्म यकिन भएको छैन । बसको आधा भाग पानीमा डुबेकाले त्यहाँ केही यात्रु च्यापिएको हुनसक्ने र केही उछिट्टिएर नदीमा बगेको हुनसक्ने आशंका गरिएको छ ।