अखबार नेपाल ट्रेन्डिङ

चितवन: मुग्लिङ-नारायणगढ सडकखण्डको कालिखोला नजिक पहिरो खसेर सडक अबरुद्ध बनेको छ । कालिखोला नजिकको सिङै डाडा सडकमा खसेको र करिव ५० मिटर सडक पुरिएकोले सवारी सुचारु हुन कम्तिमा आज दिनभर लाग्ने प्रहरीले जनाएको छ ।

रातभर पहिरो पन्छाउने काम गरिएको भएपनि बिहानसम्म २५ देखि ३० प्रतिशतमात्र पन्छाउन सफल भएको इलाका प्रहरी कार्यालय मुग्लिनले जनाएको छ । चार मेसिन पहिरो पन्छाउन प्रयोग भएपनि साँघुरो भएका कारण आलोपालो चलेका छन् । रातभर काम निरन्तर भएको इलाका प्रहरी कार्यालय मुग्लिनले जनाएको छ ।

सवारीसाधन र यात्रु रातभर बाटोमै रोकिएका छन् । ट्राफिक प्रहरी कार्यालय मुग्लिनले ठूलो पहिरो खसेका कारण पन्छाउन समय लाग्ने भएकाले यात्रुलाई वैकल्पिक सडक प्रयोग गर्न  अनुरोध गरेको छ ।

काठमाडौंबाट गएका सवारीसाधनलाई मुग्लिन, कुरिनटार, फिस्लिङ र धादिङमा रोकिएको छ भने पश्चिम र पूर्वबाट आएका सवारीसाधनलाई भरतपुरका विभिन्न क्षेत्र र नवलपुरको गैँडाकोटमा रोकिएको छ । नारायणगढ–मुग्लिन सडकखण्ड पहिरोका कारण पटक–पटक अवरुद्ध हुँदै आएको छ ।