अखबार नेपाल ट्रेन्डिङ

काठमाडौं: त्रिभुवन विमानस्थल भन्सार कार्यालयबाट जाँचपास भएर छुटेको सुन बरामद भएपनि थप सुन हुनसक्ने आशंकामा विमानस्थलमा रहेका अन्य सामान पनि चेकजाँच भइरहेको छ ।

मंगलबार हङकङबाट क्याथे प्यासिफिकको जहाजमा आएको ब्रेक शुमा लुकाइएको अन्दाजी ८० देखि १०० किलो सुन बरामद भएको थियो । ब्रेक शु रेड ट्रेड कम्पनीले मगाएको थियो । उक्त कम्पनीकै अन्य सामान पनि भन्सार कार्यालयमा भेटिएपछि कार्यालयमै जाँच गर्न थालेको हो ।

भन्सार स्रोतका अनुसार १०-११ वटा प्याकेजहरू जाँच भइसकेका छन् । यद्यपि थप सुन फेला परिसकेको छैन । अझै १३ वटा प्याकेज बाँकी छन् । ती सामानको पनि जाँच भइरहेको बुझिएको छ । त्यससँगै यसमा संलग्न भएको आरोपमा ६ जना पक्राउ परेका छन् । उनीहरूसँगको सोधपुछ एवं सुराकको आधारमा कार्यालयले  थप अपरेसन जारी राखेको हो ।

सशस्त्र प्रहरी स्रोतले काठमाडौंका केही ठाउँमा पनि खानतलासी लिएको छ । थप सुन भेटिने आशंकामा अपरेसन चलाइएको हो । अहिले विमानस्थलमा राजस्व अनुसन्धान विभागका महानिर्देशक नवराज ढुंगाना पनि पुगेका छन् । उनीसँगै भन्सार विभागका कर्मचारीहरू पनि खटिएर सुनको खोजीमा जुटेका छन् ।

यता मंगलबार बरामद भएको सुन भने जोख्नका लागि नेपाल राष्ट्र बैंकको टक्सार कार्यालय पुर्‍याइएको छ । आठ वटा पोकामा उक्त सुन राखिएको छ । यसमा संलग्न रहेको आरोपमा दोलखा घर हुने रामकुमार भुजेल, दिलिप भुजेल, भोजपुरका हर्कराज राई, भारतीय नागरिक थाप्तेन छिरिङ पक्राउ परेका छन् । एजेन्ट राजन राई र ट्याक्सी ड्राइभर अशोक लामा पनि पक्राउ परेका हुन् ।

बा २ च २३२४ नम्बरको ट्याक्सी पनि विभागले बरामद गरेको छ । उक्त ट्याक्सीबाट नै सुन लग्ने तयारी भएको थियो । यस घटनामा त्रिभुवन अन्तर्राष्ट्रिय विमानस्थलको भन्सार जाँच पास कसरी भएर निस्कियो भन्नेबारे छानबिन गर्न भन्सार विभाग अनुसन्धान शाखाका निर्देशक मानबहादुर पौडेलको नेतृत्वमा समिति गठन भएको छ ।