अखबार नेपाल ट्रेन्डिङ

काठमाडौं: ललितपुरको ग्वार्कोमा गएराति साढे १२ बजे बिएन्डबी अस्पताल अगाडिको ओरालोमा कार र ट्याक्सी ठोक्किँदा दुई जनाको मृत्यु भएको छ ।

बा २ ज ३४२० नम्बरको ट्याक्सी र बा ४ च १ नम्बरको कार ठोक्किएका हुन् । ट्याक्सीमा सवार एक जना र कारमा सवार एक जनाको मृत्यु भएको प्रहरीले जनाएको छ । ट्याक्सीमा ६ जना सवार थिए भने कारमा दुई जना सवार थिए ।

ट्याक्सीमा सवार सुनसरी घर भई ललितपुर महानगरपालिका ताल्छिखेल बस्ने ४७ वर्षीय सरोजकुमार विक र कारमा सवार चितवन घर भई टोखा नगरपालिका-७ ग्रीनल्यान्ड बस्ने प्रकाश आचार्यको मृत्यु भएको हो ।

दुर्घटना भएपछि उनीहरूलाई बिएन्डबी अस्पताल लगिएको थियो । त्यहाँ उपचारको क्रममा मृत्यु भएको हो । अन्य ६ जनालाई सामान्य चोट लागेको प्रहरीले जनाएको छ । दुर्घटनाका बारे प्रहरी वृत्त सातदोबाटोबाट थप अनुसन्धान भइरहेको छ ।