अखबार नेपाल ट्रेन्डिङ

काठमाडौं: अमेरिकी विदेश उपमन्त्री भिक्टोरिया नुलाण्ड दुईदिने नेपाल भ्रमणका लागि १५ माघमा नेपाल आउने भएकी छिन् ।

नुलाण्डको भ्रमण कार्यतालिका र उद्देश्यबारे भने विस्तृतमा केही बताइएको छैन । माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्रीमा निर्वाचित भएपछि पहिलोपटक अमेरिकाबाट उच्चस्तरीय भ्रमण हुन लागेको हो ।

अघिल्लो वर्ष नेपाल भ्रमणमा आएकी मानवअधिकार तथा तिब्बत मामिला सम्बन्धी सहायक मन्त्री जियापछि नेपाल भ्रमण आउने नुलाण्ड उच्च अधिकारी भएको बताइएको छ । नेपालसँग पछिल्ला दिनमा अमेरिकाले ‘इन्गेजमेन्ट’ बाक्लो बनाइरहेको छ ।

नेपालसँग अमेरिकाले बढाएको राजनीतिक इन्गेजमेन्टका कारणले पनि यो भ्रमण महत्वपूर्ण मानिएको छ । प्रचण्डलाई प्रधानमन्त्री बनाउन अमेरिका र भारत सहमत थिएनन् र उनीहरू कांग्रेस नेतृत्वको सरकारकै निरन्तरता चाहन्थे भन्ने विश्लेषण भइरहेको छ ।

राष्ट्रपति कम्युनिष्ट पृष्ठभूमि भएको नभईदेओस् भन्ने चाहना राख्छन् भन्ने पनि गरिन्छ । राष्ट्रपति निर्वाचन हुन एक महिनाको समय बाँकी छँदै अमेरिकी विदेश उपमन्त्री नुलाण्डको नेपाल भ्रमणलाई अर्थपूर्ण रूपमा हेरिएको छ ।