अखबार नेपाल ट्रेन्डिङ

काठमाडौं: नाबालिग बलात्कारको आरोप लागेर थुनामा रहेका क्रिकेटर सन्दीप लामिछाने २० लाख धरौटी बुझाएर थुनामुक्त हुने भएका छन् ।

क्रिकेटर लामिछानेका दाजुले जिल्ला अदालतमा धरौटी बुझाएका थिए । हिजो उच्च अदालत पाटनले धरौटीमा रिहा गर्नका लागि आदेश दिएसँगै लामिछानेका दाजु मोहन लामिछानेले जिल्ला अदालत काठमाडौंमा २० लाख रुपैयाँ धरौटी बुझाएका हुन् ।

धरौटी रकम बुझाएसँगै सन्दीप आजै छुट्ने छन् । उनका वकिल सरोजकृष्ण घिमिरेले कारागारमै पुगेर सन्दीपलाई अदालतका शर्तबारे जानकारी गराएका छन् ।

धरौटी बुझाएसँगै केन्द्रीय कारागारमा सन्दीपलाई रिहाइ गर्न अदालतले पत्र पठाएको थियो । त्यसपछि सन्दीपलाई तारिखका लागि अदालतमा उपस्थित भए । उनलाई आवश्यक स्वास्थ्य परीक्षण पछि छुटेका हुन ।

उच्च अदालतका न्यायाधीश ध्रुवराज भट्टराई र रमेश ढकालको इजलासले जिल्ला अदालतको आदेश बदर गर्दै २० लाख रुपैयाँ धरौटीमा रिहा गर्न बिहीबार आदेश दिएको थियो ।

सन्दीपका कानुन व्यवसायी घिमिरेले रिहा भएपछि सन्दीप राष्ट्रिय टिममा फर्किने बताए । थुनामुक्त भएपछि क्यानले उनलाई स्वतः कप्तान फिर्ता गर्नुपर्ने घिमिरेले बताएका छन् ।