अखबार नेपाल ट्रेन्डिङ

काठमाडौं: प्रधानमन्त्री पुष्पकमल दाहाल ‘प्रचण्ड’ र  नेकपा एकीकृत समाजवादीका अध्यक्ष माधव कुमार नेपालबीच प्रधानमन्त्री तथा मन्त्रिपरिषद्‌ कार्यालय सिंहदरबारमा भेटवार्ता भएको छ ।

प्रधानमन्त्री प्रचण्डले पुस २६ गते प्रतिनिधि सभामा विश्वासको मत लिने विषयमा छलफल भएको प्रधानमन्त्री प्रचण्डनिकट स्रोतले जानकारी दिएको छ ।

प्रधानमन्त्री प्रचण्डले केही दिन अगाडि नेपालसँग भेट गरेर सरकारलाई समर्थन गरी सरकारमा आउन भनेका थिए ।

एकीकृत समाजवादीले भने सरकारलाई समर्थन गर्ने वा नगर्ने भन्नेबारे निर्णय गरिसकेको छैन । एकीकृत समाजवादीको पोलिटब्यूरो बैठकले सरकारलाई समर्थन गर्ने विषयमा निर्णय गर्ने जिम्मा केन्द्रीय सचिवालयलाई दिएको छ ।

अध्यक्ष नेपालले बुधबार नै काठमाडौंमा आयोजित एक कार्यक्रममा सरकारलाई समर्थन गर्ने वा नगर्नेबारे पुस २६ गतेसम्म निर्णय लिइने बताएका थिए ।