अखबार नेपाल ट्रेन्डिङ

काठमाडौं: रामेछापमा एक प्रतिनिधि सभा र दुई प्रदेश सभामा गठबन्धनका उम्मेद्वार विजयी भएका छन् । गठबन्धनका साझा उम्मेद्वार नेपाली काँग्रेसका पूर्णबहादुर तामाङ (कान्छाराम) प्रतिनिधि सभा सदस्यमा विजयी भएका छन् ।

रामेछापमा कुल १ लाख ८० हजार १०६ मतदाता रहेकोमा ८८ हजार ६८० मत खसेको थियो । तामाङ ४७ हजार ९८ मतसहित विजयी भएका छन् । उनको निकटतम प्रतिद्वन्द्वी नेकपा एमालेका उम्मेदवार कैलाशप्रसाद ढुङ्गेलले ३० हजार ७२९ मत प्राप्त गरे ।

एमालेका उम्मेदवार ढुङ्गेललाई तामाङले १६ हजार ३६९ मतान्तरले पराजित गरेका हुन् । प्रतिनिधि सभातर्फको मत गणना सम्पन्न हुँदा सदर मत ८३ हजार ८९९ रहेको छ भने ४ हजार ७८१ मत बदर भएको छ ।

यस्तै प्रदेश ‘क’ मा गठबन्धनबाट माओवादी केन्द्रका उम्मेद्वार तारानारायण श्रेष्ठ विजयी भएका छन् । श्रेष्ठले १७ हजार १४८ मत प्राप्त गरे भने उनको निकटतम प्रतिद्वन्दी नेकपा एमालेका शान्ति पौडेलले १५ हजार १५७ मत प्राप्त गरे । श्रेष्ठले पौडेललाई १ हजार ९९१ मतले पराजित गरे ।

यस्तै प्रदेश ‘ख’ मा गठबन्धनका तर्फका उम्मेद्वार माओवादी केन्द्रका पोलिटब्युरो सदस्य युवराज चौलागाईंले एमालेमा मिलनकुमार घिसिङलाई पराजित पराजित गरे । चौलागाईंले २१ हजार २३९ मत प्राप्त गर्दा घिसिङले १७ हजार ४१३  मत प्राप्त गरे । चौलागाईले घिसिङलाई ४ हजार ८२६ मतान्तरले पराजित गरे ।