अखबार नेपाल ट्रेन्डिङ

काठमाडौं: रामेछापको सुनापाती गाउँपालिकामा भएको बस दुर्घटनामा मृत्यु हुनेको संख्या १२ पुगेको छ । घटनास्थलमा ९ जना र उपचारका लागि लैजाँदै गर्दा बाटैमा २ जना र एक जनाको काभ्रेको धुलिखेल अस्पतालमा मृत्यु भएको छ ।

मृत्यु भएकामध्ये ८ जनाको सनाखत भएको छ । दुर्घटनामा परी सुनापाती गाउँपालिका-५ की ६० वर्षीया तमरिता तामाङ, सोही ठाउँकी २२ वर्षकी विपना तामाङ, ३६ वर्षकी सञ्जु आलेमगर र ६० वर्षका खड्ग विक‚ सुनापाती-४ की ६० वर्षकी सन्दीपा तामाङ, काभ्रे मण्डनदेउपुर-९ की ६० वर्षीया शुभलक्ष्मी मानन्धर, रोशी गाउँपालिका-४ का वर्ष नखुलेका कमल तामाङ र सुदीप गजमेरको घटनास्थलमै मृत्यु भएको छ ।

अस्पतालमा मृत्यु भएका तीनजना र घटनास्थलमै मृत्यु भएका एकजनाको सनाखत हुन सकेको छैन । दुर्घटनामा २५ भन्दा बढी घाइते भएका छन् । आज बिहान बा ३ ख ८३९६ नम्बरको बस सुनापती–५ र खाँडादेवी गाउँपालिका–१ को सिमानामा दुर्घटना भएको हो ।