अखबार नेपाल ट्रेन्डिङ

काठमाडौं: महानगरीय प्रहरी परिसर काठमाडौंले सार्वजनिक सवारी साधनमा पाकेटमार तथा चोरी गर्ने ८२ व्यक्तिलाई पक्राउ गरेको छ । काठमाडौबाट सादा पोशाकमा खटिएको टोलीले जेठ महिनामा काठमाडौंका विभिन्न स्थानमा चल्ने सार्वजनिक सवारी साधनमा पाकेटमार तथा चोरी गर्ने ७८ पुरुष र चार महिलालाई पक्राउ गरेको हो ।

परिसरले आज पत्रकार सम्मेलन गरी काठमाडौंमा चल्ने बस तथा माइक्रोबसमा यात्रा गर्ने यात्रुको पकेट तथा झोलामा रहेको नगद, मोबाइल तथा गरगहना चोर्दाचोर्दै पक्राउ गरिएको जानकारी दिएको हो । परिसरले केही समययता सार्वजनिक सवारीसाधनमा सादा पोशाकका प्रहरी खटाएको छ । तिनीहरूले यात्रुहरूको सुरक्षा अवस्थाबारे निगरानी गर्छन् । अभियानकै रुपमा जेठ १ गतेदेखि प्रहरीले यसलाई निरन्तरता दिएको थियो ।

यातायात साधनमा चोरी, लुटपाट, महिला हिंसा तथा यौनजन्य क्रियाकलाप बढेपछि प्रहरी खटाउन थालिएको परिसर प्रमुख प्रहरी बरिष्ठ उपरीक्षक उत्तमराज सुवेदीले बताए । ‘यौनजन्य क्रियाकलापको छानबिन तथा अनुसन्धान महानगरीय प्रहरी कार्यालय रानीपोखरीले हेरिरहेको छ,’ उनले भने ।