अखबार नेपाल ट्रेन्डिङ

काठमाडौं: आसन्न स्थानीय तह निर्वाचनका लागि पाँच दलीय गठबन्धनको चुनावी सभा सुरु भएको छ ।

गठबन्धनका काठमाडौं महानगरका प्रमुखका साझा उम्मेदवार सिर्जना सिंहले निर्वाचन जितेर गएपछि महानगरलाई महान् घर बनाउने लक्ष्य राखेको बताएकी छन् ।

रत्नपार्कस्थित शान्ति बाटिकामा आयोजित चुनावी सभा सम्बोधन गर्दै सिंहले काठमाडौं महानगरलाई महान् घर बनाउने लक्ष्य रहेको बताएकी हुन् ।

‘पार्टीले मलाई काठमाडौंको मेयरका लागि अघि सारेको छ । यो हामी महिलाको जित भएको छ । सबै महिला आन्दोलनका लागि गौरवको कुरा हो,’ सिर्जनाले भनिन्, ‘म जितेर गएपछि महानगरलाई महान् घर बनाउने लक्ष्य रहेको छ ।’

उनले काठमाडौंको सम्पदा, सभ्यता, संस्कृति बचाउन सधैं सक्रिय रहने प्रतिवद्धता पनि जनाइन् । सिर्जनाले महानगरको प्रमुख भएपछि सुशासन ल्याउनु पहिलो दायित्व हुने पनि बताइन् ।

‘महानगरपालिकामा सुशासन ल्याउनु मेरो पहिलो दायित्व हुनेछ । घरभित्र सुशासन भएन भने बाहिर ठूला–ठूला कुरा गर्नुको कुनै औचित्य हुन्न,’ उनले भनिन् ।

काठमाडौं महानगरमा ट्राफिक जाम, फोहोर समस्या विकराल बन्दै गएको भन्दै तिनलाई समाधानका लागि पहल गर्ने उनले बताइन् ।

महानगरका महिलालाई सीपमुलक तालिम दिएर आत्मनिर्भर बनाउने, विदुर पुरुषका लागि पनि विशेष राहत प्याकेज ल्याउने उनले प्रतिबद्धता जनाइन् ।

महिलाले उत्पादन गरेका वस्तुलाई प्रत्येक वडामा कोसेली घर बनाएर बजारको व्यवस्थापन गर्ने, युवा वर्गका लागि विशेष योजना बनाउने बताइन् । ‘प्रत्येक वडामा ज्येष्ठ नागरिक भवन बनाएर ज्येष्ठ नागरिकका लागि दिनचर्या कटाउन सहज बनाउने छु,’ उनले भनिन्, ‘७७ जिल्लाकै बासिन्दा बसोबास गर्ने सहर हो यो । काठमाडौंको आफ्नै मौलिक परम्परा छ । त्यसलाई उजागर गर्न सधैँ ध्यान दिनेछु । विश्व सम्पदा सूचीमा परेको सहर हो यो । ऐतिहासिक सभ्यताका यस्ता सहरलाई पर्यटकीय स्थल बनाउन सकेका छैनौं, काठमाडौंलाई विश्वकै पर्यटकीय सहर बनाउने छु ।’