अखबार नेपाल ट्रेन्डिङ

काठमाडौं: चौध वर्ष अगाडि जिउँदै मान्छेलाई ईट्टभट्टामा जलाएको आरोप लागेका महमद अफ्ताब आलम जेलमै बस्ने भएका छन् ।

सर्वोच्च अदालतले पनि उनलाई मुद्दाको अन्तिम फैसला नहुन्जेल थुनामै राख्ने जिल्ला अदालत र उच्च अदालतको आदेश सदर गरेपछि यो अवस्था आएको हो ।

सर्वोच्च अदालतमा न्यायाधीशद्वय सुष्मलता माथेमा र नहकुल सुवेदीको संयुक्त इजलासमा शुक्रबार सुनुवाइ भएको हो ।

सर्वोच्चले आलमको थुनाबाहिर बसेर मुद्दा लड्न पाउँ भन्ने मागलाई अस्वीकार गरेको छ ।

नेता आलममाथि २०६४ साल चैत २७ मा भएको संविधानसभा निर्वाचनका क्रममा बम विस्फोट हुँदा घाइतेलाई इँटाभट्टामा जलाएर मारेको र विस्फोटक पदार्थ बम समेतको प्रयोग गरी ज्यान मार्ने उद्योगको मुद्दा छ ।

आलमलाई तीन वटा मुद्दामा ३२ वर्ष कैदको माग गरिएको छ । बम बिस्फोट, कर्तव्य ज्यान र ज्यान मार्ने उद्योगको मुद्दा उनीविरुद्ध दर्ता भएको हो ।

मुद्दाको अन्तिम फैसला बाँकी नै । फैसला नहुन्जेल उनी कारागारमै रहने निश्चित भएको छ ।