अखबार नेपाल ट्रेन्डिङ

काठमाडौं: नेपाल प्रहरीको पछिल्लो तथ्याङ्क अनुसार देशभर केही जघन्य प्रकृतिका अपराधहरुमा कमी आएको जनाएको छ ।

कर्तब्य ज्यान, ज्यान मार्ने उद्योग, आत्महत्या, करणी जस्ता अपराधहरुमा कमी आएको नेपाल प्रहरीका प्रवक्ता एसएसपी बसन्त कुँवरले जानकारी दिए ।

त्यस्तै, चोरी, बैकिङ कसुर, लागु औषध, ठगी जस्ता घटना भने बृद्धि भएको छ ।

गएको पाँच महिनाको अवधिमा सबैभन्दा धेरै बैंकिङ कसुरका घटना बढेको प्रवक्ता कुँवरले जानकारी दिए ।

‘पाँच महिना अगाडिसम्म लकडाउनले धेरै प्रभाव पारेको थियो । मानिसहरु घरमा नै थिए । जसले गर्दा चोरी र अन्य अपराधिक गतिविधि भएको थिएन । अहिले मानिस घरमा नभएकाले गर्दा पनि चोरीको घटना बढेका छन्,’ एसएसपी कुँवरले भने ।

गएको पाँच महिनामा देशर २४६ वटा हत्या भए । तर, सोही समयको अघिल्लो आर्थिक वर्षमा २९० वटा हत्याका घटनाहरु भएका थिए ।

आर्थिक वर्ष २०७७/७८ मा २९५८ जनाले आत्महत्या गरेका थिए ।

चालु आर्थिक वर्षमा आत्महत्याको सङ्ख्यामा कमी आएको छ ।

२६२८ जनाले आत्महत्या गरेका छन् ।

तुलनात्मक रुपमा ११ प्रतिशतले आत्महत्यामा कमी आएको हो ।

करणीका घटनामा पनि ९ प्रतिशतले कमी आएको छ । गएको पाँच महिनामा ९९३ वटा करणीका घटना भएका छन् ।

आर्थिक वर्ष २०७७/७८ को पाँच महिनामा १०९७ वटा यस्ता घटना भएका थिए ।

हातहतियार खरखजना सम्बन्धी अपराधमा पनि कमी आएको छ ।

२१ प्रतिशतले यस्ता घटनाहरु कमी आएको हो ।

आर्थिक वर्ष २०७७/७८ को पाँच महिनामा मा ११३ वटा घटना भएका थिए ।

तर, आर्थिक वर्ष २०७८/७९ को पाँच महिनामा ८९ वटा घटना प्रहरीमा दर्ता भएका छन् ।

सबै अपराधहरुको सङख्या कमी भए पनि बैकिङ कसुर सम्बन्धी घटनाहरु बढेको छ ।

१०५ प्रतिशतले यस्ता घटनाहरु बढेको देखिन्छ ।

चालु आर्थिक वर्षको पाँच महिनामा १८०७ वटा बैकिङ कसुर सम्बन्धि घटना दर्ता भएका हुन् ।

आर्थिक वर्ष २०७७/७८ मा ८८० वटा मात्र बैकिङ कसुरका घटना भएका थिए ।

त्यस्तै चोरीको घटना पनि ३५ प्रतिशत माथि बृद्धि भएको छ ।

चालु आर्थिक वर्षको पाँच महिनामा १२३७ वटा चोरीका घटना भएको देखिन्छ ।

आर्थिक वर्ष २०७७/७८ मा  ९ सय १६ वटा मात्र घटना भएका थिए ।