अखबार नेपाल ट्रेन्डिङ

काठमाडौं: नेकपा माओवादी केन्द्रले गैर भौगोलिक सहित ९ प्रदेशमध्ये ६ प्रदेशको नेतृत्व अझै टुंगो लगाउन सकेको छैन ।

गएको शनिबार अध्यक्ष पुष्पकमल दाहाल प्रचण्डले ७ भौगोलिक र २ गैर भौगोलिकको संयुक्त रुपमा भर्चुअल माध्यमबाट उद्घाटन गरेका थिए ।

अहिलेसम्म उपत्यका विशेष प्रदेश अध्यक्षमा जगत सिम्खडा, सम्पर्क समन्वय समिति प्रदेश अध्यक्षमा श्रीकृष्ण अधिकारी र गण्डकी प्रदेशको अध्यक्ष गायत्री गुरुङको मात्रै टुंगो लगाएको छ ।

प्रवास प्रदेश समिति उद्घाटन नै नभएकाले पछि मिति तोकेर सम्मेलन गरिने भएको छ ।

प्रदेश समिति कति सदस्य हुने भन्ने विषयमा सहमति भएपनि अध्यक्षसहित पदाधिकारीमा टुंगो लाग्न सकेको छैन ।

प्रदेश अध्यक्ष हुन पार्टी केन्द्रीय सदस्य नै दौडमा उत्रिएपछि मिलाउन गाह्रो भइरहेको छ । प्रदेश अध्यक्ष भएमा स्थानीय तह र प्रदेशमा टिकट वितरणमा हस्तक्षेप हुने भएपछि केन्द्रीय तहका नेताहरु प्रदेशमा नेतृत्व लिन अग्रसर भएका हुन् ।

प्रदेश १ मा २ सय ५१ सदस्यीय प्रदेश कमिटी मात्रै बनाएको छ । अध्यक्षका लागि केन्द्रीय सदस्य हेमराज भण्डारी, सुदन किराती र सुरेशकुमार राई तीन जनाले दाबी गरेपछि सर्वसम्मत हुन सकेको छैन ।

तीनै जना केन्द्रीय सदस्य छोडेर प्रदेश अध्यक्ष हुन तयार भएका छन् । आगामी बुधबार प्रदेश पदाधिकारीका विषयमा छलफल भई टुंगो लगाउने भनिएको छ ।

प्रदेश २ मा पालिका अधिवेशन नै नसकिएकाले पुस ३ गते प्रदेशको बन्दसत्र गर्ने भएको छ । त्यसपछि प्रदेश पदाधिकारी प्रदेश समिति टुंगो लगाउने भएको छ ।

बागमती प्रदेशमा अध्यक्षसहित पदाधिकारीमा सर्वसम्मत हुन नसकेपछि २ सय ७५ सदस्यीय प्रदेश समिति मात्रै घोषणा गरिएको छ ।

अध्यक्षका लागि प्रदेश समितिमा रहेका विशाल खड्का, सरल सहयात्री पौडेल, दीनानाथ गौतम र डीपी ढकालले दाबी गरेका छन् ।