अखबार नेपाल ट्रेन्डिङ

एजेन्सीः विश्वभर कोरोना भाइरसको संक्रमण बढिरहेका बेलमा दक्षिण एशियाली (सार्क) मुलुकमा पनि यसको प्रभाव बढ्दै गएको छ । सार्क मुलुकमध्ये भारतमा सबैभन्दा बढी मानिस कोरोनाको संक्रमणबाट संक्रमित भएका छन् भने धेरै ज्यान पनि गएको छ ।

नेपालसहित सार्क मुलुकमा आशिंक बाहेक लकडाउन जारी छ । हालसम्म सार्क राष्ट्रमा २ लाख ५१ हजार ३ सय ४३ जना मानिस संक्रमित छन् । भारत बाहेकका देशमा १ लाख ६ हजार ३ सय ९३ जना संक्रमित छन् । संक्रमित मध्ये ६ हजार ७७ जनाको जयान गइसकेको छ भने ८७ हजार ६ सय २४ जना निको भएर घर फर्किसकेका छन् ।

पछिल्लो २४ घण्टामा मात्रै भारतमा ६ हजार ४ सय १४ जना नयाँ कोरोना संक्रमित थपिएका छन् । जसमध्ये १ सय ४८ जनाको ज्यान गएको छ । भारतमा हालसम्म १ लाख ४४ हजार ९ सय ५० जना कोरोना संक्रमित भएका छन् । जसमध्ये ४ हजार १ सय ७२ जनाको ज्यान गइसकेको छ । हालसम्म भारतमा ६० हजार ७ सय ६ जना संक्रमित निको भएर घर फर्किसकेका छन् ।

यसैगरी कोरोना भाइरसको संक्रमणबाट पाकिस्तानमा हालसम्म एक हजार १ सय ६७ जनाको ज्यान गएको छ । हालसम्म ५६ हजार ३ सय ४९ जना संक्रमित भएका छन् । जसमध्ये ३७ हजार ७ सय जनाको उपचार सफल भएको छ । पाकिस्तानमा अहिलेपनि लकडाउन जारी छ ।

यसैबीच बंगलादेशमा पनि कोरोनाको संक्रमण बढ्दै गएको छ । बंगलादेशमा हालसम्म ३५ हजार ५ सय ८५ जना कोरोना संक्रमित भएका छन् । जसमध्ये ५ सय १ संक्रमितको ज्यान गएको छ । बंगलादेशमा हालसम्म ७ हजार ३ सय ३४ संक्रमित निको भएर घर फर्किसकेका छन् ।

यसैगरी सार्क राष्ट्र अफगानिस्तामा कोरोनाबाट २ सय १९ जनाको ज्यान गएको छ भने कोरोना संक्रमितको संख्या ११ हजार १ सय ७३ पुगेको छ । जसमध्ये १ हजार ९७ जना संक्रमित निको भएर घर फर्किसकेका छन् ।

यसैबीच कोरोना संक्रमण श्रीलंकामा सामान्य देखिएको छ । श्रीलंकामा सोमबार ४१ जना नयाँ कोरोना संक्रमित थपिएसँगै बिरामीको संख्या १ हजार १ सय ८२ पुगेको वल्डोमिटरले जनाएको छ । सोमबार १ जनाको ज्यान गएको श्रीलंकामा कोरोनाको संक्रमण भएर ज्यान गुमाउनेको संख्या १० पुगेको छ ।

यसैगरी भुटानमा कोरोनाको प्रभाव सबैभन्दा कम परेको छ । भुटानमा हालसम्म जम्मा २७ जना संक्रमित देखिएका छन् । जसमध्ये ३ जना निको भएर घर फर्किसकेका छन् ।

सार्क राष्ट्रमध्यको सबैभन्दा सानो टापु देश माल्दिभ्समा सोमबार २४ जना नयाँ कोरोना संक्रमित फेला परको छन् । यो सँगै माल्दिभ्समा कोरोना संक्रमितको संख्या १ हजार ३ सय ९५ पुगेको छ । जसमध्ये १ सय ५५ जना निको भएर घर फर्किसकेका छन् भने ४ जनाको ज्यान गएको छ ।

सार्क मुलुकको अध्यक्ष राष्ट्र नेपालमा पनि कोरोनाका संक्रमण बढ्दै गएको छ । सोमबार एकै दिन नेपालमा ७९ जना कोरोना संक्रमित थपिएसँगै संक्रमितको संख्या ६ सय ८२ पुगेको स्वास्थ्य तथा जनसंख्या मन्त्रालयले जनाएको छ । नेपालमा कोरोना संक्रमित मध्ये १ सय ५५ जना निको भएर घर फर्किसकेका छन् । नेपालमा कोरेना निको हुनेको प्रतिशत सार्क राष्ट्रमध्यकै सबैभन्दा बढी हो ।