अखबार नेपाल ट्रेन्डिङ

काठमाडौं: आईसीसी महिला विश्वकप क्रिकेट एसिया छनोटमा नेपालले आज कुवेतसँग प्रतिस्पर्धा गर्दैछ । थाईल्याण्डमा जारी प्रतियोगितामा नेपालले आफ्नो अन्तिम खेल कुवेतविरुद्घ खेल्न लागेको हो ।

बैंककको एआईटी मैदानमा हुने खेल नेपाली समय अनुसार बिहान पौने नौ बजे सुरु हुनेछ । नेपालका लागि कुवेतविरुद्धको खेल ग्लोबल छनोटमा स्थान बनाउन महत्वपूर्ण रहेको छ । सात राष्ट्र सम्मिलित छनोटमा शीर्ष स्थानमा रहने टोलीले ग्लोबल छनोटमा स्थान बनाउने छन् ।

पाँच खेल खेलेको नेपाल चार जितसहित ८ अंक जोडेर अंक तालिकाको तेस्रो स्थानमा रहेको छ । नेपालले आजको खेलमा कुवेतविरुद्घ फराकिलो जित निकाल्नु पर्नेछ । यता पाँच खेलमा शत प्रतिशत जितसहित १० अंक जोडेको थाइल्याण्ड शीर्ष स्थानमा रहेको छ । पाँच खेलमा चार जित निकाल्दै युएई अंक तालिकाको दोस्रो स्थानमा छ । थाइल्याण्ड र यूएईको खेल पनि आज नै हुनेछ ।

थाइल्याण्ड पराजित भएमा नेपाल र यूएईमध्ये एक टोलीले ग्लोबल छनोटमा स्थान बनाउने छन् । तर, युएईले जितेको खण्डमा नेपाल नेट रन रेटमा पछि पर्न सक्नेछ । त्यसैले नेपाललाई आझको खेलमा फराकिलो जितको आवश्यकता रहेको छ ।