अखबार नेपाल ट्रेन्डिङ

काठमाडौं: १३औं दक्षिण एसियाली खेलकुद (साग) पुरुष फुटबल अन्तर्गत लिग चरणको अन्तिम खेलमा नेपालले बंगलादेशलाई १-० गोल अन्तरले हराउँदै फाइनलमा प्रवेश गरेको छ ।

त्रिपुरेश्वरस्थित दशरथ रंगशालामा आइतबार भएको खेलमा कप्तान सुजल श्रेष्ठको पासमा सुनिल बलले पहिलो हाफको सुरुवाती समयमा नै दोस्रो बार च्याप्दै गोल गरेका थिए । खेलको २६औं मिनेटमा कप्तान सुजल श्रेष्ठको प्रहार बगलादेशी गोलरक्षकले बचाउदा नेपाल अग्रता दोब्बर पार्नबाट चुकेको थियो ।

दोस्रो हाफमा घरेलु टोली नेपाललाई बंगलादेशी खेलाडीले दवावमा राखेपनि नेपालले शुरुमै लिएको अग्रता जोगाइ राख्न सफल भयो । खेलको ६१औं मिनेटमा बंगलादेशले बराबरीको सुन्दर मौका खेर फालेको थियो । बंगलादेशी खेलाडीको प्रहार गोलपोस्ट नजिकैबाट बाहिरिएको थियो ।

नेपाल यस नतिजासँगै लिग चरणमा ४ खेलमा १० अंक जोड्यो भने दोस्रो स्थानमा रहेको भुटानले ९ अंक सहित फाईनलमा प्रवेश गरेका छन् । बंगलादेश ४ अंकसहित कास्य पदकमा सिमित भयो । श्रीलंका र माल्दिभ्स २-२ अंकसाथ पुछारमा रहे । नेपालले अब मंगलबार हुने फाइनलमा भुटानको सामना गर्नेछ ।