अखबार नेपाल ट्रेन्डिङ

काठमाडौं: जारी फिफा विश्वकप-२०२६ अन्तर्गत आज राति अर्जेन्टिना र इङ्गल्यान्डबीच दोस्रो सेमिफाइनल खेल हुँदैछ । यी दुई टोलीबीचको खेल मध्यराती १२:४५ बजे सुरु हुनेछ । फुटबलमा यी दुई टोलीबीचको खेलमा राजनीतिक इतिहास पनि मिसिएको छ । सन् १९८६ को विश्वकप क्वाटरफाइनलमा डिएगो म्याराडोनाको आलोचकीय ‘ह्यान्ड अफ गड’ र शताब्दीकै उत्कृष्ट गोलको सहयोगमा अर्जेन्टिनाले इङ्गल्यान्डलाई हराएको थियो ।

अर्जेन्टिनाले यस जितलाई फकल्यान्ड युद्धमा ब्रिटिससँग हारेको बदलाका रूपमा पनि लिएको थियो । १२ वर्षपछि यी दुई टिमबीचको खेल सो समयका सुपर स्टार इङ्गल्यान्डका डेभिड बेकहामका लागि चुनौती बन्यो । बेकहामका कारण नै इङ्गल्यान्डको पराजयको कारण पनि बन्यो । पछि बेकहामले चार वर्षपछि नै गोल गरेर अर्जेन्टिनालाई समूह चरणबाट बिदा गराएर बदला लिन सफल थियो । अर्जेन्टिना सन् १९६२ मा ब्राजिलपछि विश्वकप उपाधि रक्षा गर्ने पहिलो टिम बन्ने प्रयास गर्दैछ । यदि उसले इङ्गल्यान्डविरुद्ध जित प्राप्त गरेमा अर्जेन्टिनाले पछिल्ला चार विश्वकपमध्ये तीनमा फाइनल खेलेको गौरव हासिल गर्नेछ ।

इङ्गल्यान्ड भने सन् १९६६ मा विश्वकप जितेको गौरवलाई दोहोर्‍याउने अभियानमा छ । सो विश्वकप इङ्गल्यान्डको अहिलेसम्मकै एक मात्र प्रमुख अन्तर्राष्ट्रिय उपाधि हो । त्यसपछि इङ्गल्यान्डले धेरै पटक नजिक पुगेर पनि प्रमुख उपाधि जित्न सकेको छैन । पछिल्ला ८ वर्षको मात्र कुरा गर्ने हो भने इङ्गल्यान्ड विश्वकप २०१८ को सेमिफाइनल तथा युरो च्याम्पियनसिप २०२१ र २०२४ को फाइनलमा पुगेको थियो । इङ्गल्यान्ड यसपालि विश्वकप उपाधिको खडेरीलाई समाप्त पार्ने दाउमा हुनेछ ।

उपाधि रक्षा अभियानमा रहेको अर्जेन्टिनाको सेमिफाइनलसम्मको यात्रा अपेक्षा गरेभन्दा कठिन नै भएको थियो । विशेषत: नकआउट चरणका खेलहरूमा उसले निकै कठिन लडाइँ लडेको हो । यसको विपरीत इङ्गल्यान्ड भने सेमिफाइनलसम्मको यात्रामा प्रभावशाली देखिएको छ । अर्जेन्टिनाको आशा भने जिवितै छ । अहिलेसम्म क्वाटरफाइनलबाहेक अर्जेन्टिनाका लागि लियोनेल मेसीको ‘वन म्यान शो’ भइरहेको छ । मेसी ८ गोल र २ असिस्ट गर्दै गोल्डेन बुटको दाबेदारीमा फ्रान्सेली स्ट्राइकर किलियन एम्बाप्पेसँगै अग्रस्थानमा छन् ।

पहिलो पटक इङ्गल्यान्डविरुद्ध मेस्सी

अर्जेन्टिनाका कप्तान मेस्सीले आफ्नो फुटबल करियरमा सम्भवत: सबै जसो अनुभव गरिसके । यद्यपि ३९ वर्षीय मेस्सीले अहिलेसम्म इङ्गल्यान्डविरुद्ध खेलेका छैनन् । यस विश्वकपमा मेस्सीले अर्जेन्टिनाको परम्परागत प्रतिद्वन्द्वी इङ्गल्यान्डविरुद्ध पनि खेल्ने अवसर पाएका हुन् । सन् २००५ मा १८ वर्षको छँदा अन्तर्राष्ट्रिय फुटबलमा डेब्यू गरेको मेस्सीले अर्जेन्टिनाका लागि दुई सयभन्दा बढी खेल खेलिसके । उनी अहिले एक पटक फेरि अर्जेन्टिनालाई विश्व च्याम्पियन बनाउने अभियानमा छन् ।

मेस्सी अहिले विश्व फुटबलका महान् फुटबलर डिएगो म्याराडोनाको बराबरी गर्ने ठाउँमा पनि छन् । म्याराडोनाले आफ्नो नेतृत्वमा दुई पटक अर्जेन्टिनालाई विश्वविजेता बनाएका थिए ।  मेस्सीको नेतृत्वमा अर्जेन्टिनाले चार वर्षअघि कतारमा विश्वकपको उपाधि जितिसकेको छ । यसपालि उपाधि रक्षा गरेमा मेस्सीले म्याराडोनाको बराबरी गर्नेछन् । मेसी विश्वकप फुटबलका सर्वकालीन सर्वाधिक गोलकर्ता पनि हुन् । उनले विश्वकपमा २२ खेलमा सबैभन्दा बढी २१ गोल गरेका छन् ।