अखबार नेपाल ट्रेन्डिङ

काठमाडौं: जारी फिफा विश्वकप फुटबल-२०२६ को पहिलो सेमिफाइनलमा आज राति १२:४५ बजे फ्रान्स र स्पेनबीच प्रतिष्पर्धा हुँदैछ । यी दुई टोली यस विश्वकपमा बलियो टोली हो । त्यसैले युरोपेली च्याम्पियन स्पेन र गत उपविजेता फ्रान्सबीचको खेललाई फाइनलअघिको फाइनलको रुपमा हेरिएको छ ।

फ्रन्सका लागि केलियन एम्बाप्पेको कप्तानीमा मैदान उत्रने छ । एम्बाप्पेसहित बालन डी ओर विजेता ओसमान डेम्बेले, बायर्न म्युनिखका स्टार माइकल ओलिस, पेरिस सेन्ट जर्मनका ब्राडली बारकोला र डिजाइरी डोउ जस्ता भरपर्दो स्ट्राइकर छन् । एम्बाप्पेले जारी विश्वकपमा ८ गोल र तीन ‘एसिस्ट’ र डेम्बेलेले पाँच गोल गरिसकेका छन् । ओलिसको नाममा अहिलेसम्म पाँच एसिस्ट रहेको छ तर यी खेलाडीलाई पनि स्पेनको डिफेन्स तोड्न सहज हुने छैन ।

यस विश्वकपमा स्पेन प्रिक्वाटरफाइनलसम्म गोलको सामना नगरी लगातार छ खेल ‘क्लिनसिट’ को कीर्तिमान बनाएको टोली हो । यस क्रममा स्पेनका गोलरक्षक उनाई सिमन्सले विश्वकपमा गोल नबेहोरेर कीर्तिमान पनि राखेका छन् । यस विश्वकपमा फ्रान्सको जस्तो आक्रामक स्वभाव स्पेनले देखाएको छैन तर लुइस डी ला फुएन्टेको प्रशिक्षकत्वमा उसले सावधानीपूर्ण र बलमाथि नियन्त्रण बनाएर आक्रमण गर्ने फुटबल खेल्दैछ । जुन शैलीमा खेलेर स्पेन सन् २०१० मा विश्वकप च्याम्पियन बनेको थियो ।

डी ला फुएन्टेकै प्रशिक्षणमा स्पेनले सन् २०२३ मा युइएफए नेसन्स लिग र सन् २०२४ मा युरोपियन कप जितेको थियो । पछिल्लो वर्ष पनि स्पेनले नेसन्स लिगको फाइनल खेलेको थियो । स्पेन एकजुट भएर फुटबल खेल्नेमा विश्वास गर्ने टोली हो । यस टिममा रोड्री, पेड्री र फाबियन रुइज जस्ता विश्वस्तरीय मिडफिल्डर छन् । सो मिडफिल्डलाई अहिलेका ‘टिनेज’ विङ्गर लामिने यमालको साथ छ । स्पेनका फरवार्डमध्ये अनपेक्षित रूपमा मिकेल आयरजाबलले ४ गोल गरेर चम्किएका छन् ।

यद्यपि पछिल्ला दुई खेलमा उनले गोल गर्न सकेका छैनन् । त्यसैले स्पेनी फरवार्डमा चर्चा वैकल्पिक स्ट्राइकर मिकेल मेरिनोको छ । मेरिनोले वैकल्पिक खेलाडीका रूपमा मैदान प्रवेश गरेर प्रिक्वाटरफाइनलमा पोर्चुगल र क्वाटरफाइनलमा बेल्जियमविरुद्ध अन्तिम समयमा निर्णायक गोल गरेका थिए ।

अहिलेसम्म खासै परीक्षण हुन नपाएको फ्रान्सका डिफेन्सलाई दबाब दिने चुनौती छ तर फ्रान्सविरुद्धको हालका प्रदर्शनले स्पेनलाई उत्साहित भने पारेको छ। गत वर्ष युइएफए नेसन्स लिगमा स्पेनले फ्रान्सलाई ५-४ ले हराएको थियो । यसै गरी युरो-२०२४ जित्ने क्रममा पनि स्पेनले फ्रान्सको चुनौती सेमिफाइनलमा २-१ ले समाप्त पारेको थियो ।

यद्यपि यस विश्वकपमा सबैभन्दा प्रभावशाली टोलीको रूपमा प्रस्तुत भएको फ्रान्सले यस विश्वकपमा १६ गोल गरेर मात्र दुई गोल बेहोरेको छ । आफ्नो ‘फ्रिफ्लोड’ खेलले अहिलेसम्म सबै खेलमा सहज जित प्राप्त गरेको फ्रान्सेली टोली यस विश्वकपको सबैभन्दा सन्तुलित टोली पनि हो । जसको ‘बेन्च’ शक्ति पनि उत्तिकै बलियो छ ।

विश्वकपको इतिहासमा फ्रान्स लगातार तीन संस्करणमा फाइनल खेल्ने मात्र तेस्रो टिम बन्ने दाउमा हुनेछ । जर्मनीले (१९८२-९० र २००२-१४) तथा ब्राजिलले (१९९४, १९९८, २००२) मा लगातार तीन विश्वकप फाइनल खेलेका थिए । यस विश्वकपमा दुवै टिमका केही खेलाडी व्यक्तिगत पुरस्कारको होडमा पनि सामेल छन् । यमाल यस विश्वकपमा युवा प्लेअर अफ दी टुर्नामेन्टका दाबेदार हुन् । यसै गरी स्पेनका गोलरक्षक उनाई सिमन्ले गोल्डेन ग्लोब्स जित्ने सम्भावना धेरै छ ।

फ्रान्सका किलियन एम्बाप्पेको नजर गोल्डेन बुट र गोल्डेन बल दुवैमा छ । यसै गरी डेम्बेले पनि गोल्डेन बलका दाबेदार हुन् । फ्रान्स र स्पेन फुटबलमा परम्परागत प्रतिद्वन्द्वी हुन् । यी दुई टोलीबीच अहिलेसम्म ३८ खेल भएका छन् । जसमध्ये स्पेनले १८ र फ्रान्सले १३ खेल जितेका छन् । ७ खेल बराबरीमा सकिएको थियो । विश्वकपमा यी दुई टोली एक पटक मात्र आमनेसामने भएका छन् । सन् २००६ मा भएको विश्वकपको अन्तिम १६ मा फ्रान्सले स्पेनलाई ३-१ ले पराजित गरेको थियो ।