अखबार नेपाल ट्रेन्डिङ

काठमाडौं: जारी फिफा विश्वकप अन्तर्गत समूह ‘ई’ को आफ्नो अन्तिम तथा निर्णायक खेलमा इक्वेडरले बलियो टोली जर्मनीमाथि २-१ को रोमाञ्चक जित दर्ता गरेको छ । यो ऐतिहासिक जितसँगै इक्वेडर प्रतियोगिताको नकआउटको अन्तिम ३२ मा प्रवेश गरेको छ ।

यसअघि नै लगातार दुई खेल जितेर नकआउट चरणमा पुगिसकेको जर्मनी पराजित भएपनि गोल अन्तरका आधारमा समूह विजेता बन्न सफल भयो । यता सुरुआती दुई खेलमा कोट डिभ्वार र कुरासाओ विरुद्ध गोल गर्न नसकेको इक्वेडरका लागि यो खेल गर या मरको अवस्थामा थियो । खेलको दोस्रो मिनेटमै जर्मनीले अग्रता लिएको थियो ।

फ्लोरियन विर्ट्जको पासमा लेरोय सानेले पेनाल्टी बक्सभित्रबाट उत्कृष्ट गोल गर्दै जर्मनीलाई १-० को अग्रता दिलाए । सुरुवातमै गोल खाए पनि दबाबमा नआई इक्वेडरले आक्रामक खेल जारी राख्यो । खेलको ९औँ मिनेटमा इक्वेडरका लागि निलसन एन्गुलोले बराबरी गोल फर्काए । पाब्लो विटेले जर्मनीको हाफमा बल खोसेर दिएको पासलाई सदुपयोग गर्दै एन्गुलोले डि-बक्स बाहिरबाट प्रहार गरेको बल जर्मनीका गोलकिपर मानुएल नोयरलाई छलाउँदै जाली चुमेको थियो ।

जारी विश्वकपमा इक्वेडरको यो पहिलो गोल हो । दोस्रो हाफको सुरुवातमै रेफ्री टोरी पेन्सोले जर्मनीलाई पेनाल्टी दिएकी थिइन्, तर भिएआरको भिडियो रिभ्युपछि सानेले विटेमाथि फाउल गरेको देखिएपछि उक्त पेनाल्टी रद्द गरियो । खेलको ७७औँ मिनेटमा इक्वेडरले निर्णायक गोल गर्‍यो । कर्नरबाट आएको बललाई वैकल्पिक खेलाडी केभिन रोड्रिगेजले फ्लिक गरेपछि जाली चुम्दै टोलीलाई २-१ को अग्रता दिलाए ।

यो जितसँगै इक्वेडर उत्कृष्ट तेस्रो स्थानमा रहने टोलीहरूमध्ये पर्दै नकआउट चरणमा पुग्न सफल भएको छ । जर्मनी पराजित भएपनि ६ अङ्क र गोल अन्तरका कारण समूह विजेता बन्यो । समान ६ अङ्क नै जोडेको कोट डिभ्वार भने गोल अन्तरका आधारमा दोस्रो स्थानमा रहँदै अघिल्लो चरण प्रवेश गरेको छ ।