अखबार नेपाल ट्रेन्डिङ

काठमाडौं: साफ क्लब महिला च्याम्पियनसिप अन्तर्गत सोमबार भएको खेलमा भारतको इस्ट बंगाल फुटबल क्लबले भुटानको ट्रान्सपोर्ट युनाइटेडमाथि ४–० गोल अन्तरले जित निकालेको छ ।

त्रिपुरेश्वरस्थित दशरथ रंगशालामा सम्पन्न खेलमा जितसँगै इस्ट बंगालले अंकतालिकामा महत्त्वपूर्ण तीन अंक जोडेको छ । ट्रान्सपोर्ट युनाइटेडले भने पहिलो हार बेहोरेको छ । टोलीको २ खेलबाट १ अंक छ । खेलको ३५औं मिनेटमा फाजिला इकवापुटले पहिलो गोल गर्दै इस्ट बंगाललाई अग्रता दिलाइन् ।

दोस्रो हाफमा पनि आक्रमक बनेको टोलीले ५८औं मिनेटमा सुलञ्जना राउलमार्फत अग्रता दोब्बर बनायो। त्यसपछि ६२औं मिनेटमा रेस्ती नान्जिरीले गोल गर्दै खेललाई एकतर्फी बनाइन् । ७१औं मिनेटमा फाजिलाले व्यक्तिगत दोस्रो गोल गरेसँगै इस्ट बंगालले ४–० को प्रभावशाली जित सुनिश्चित गर्‍यो ।

त्यसैगरी सोमबार नै सम्पन्न दोस्रो खेलमा पाकिस्तानको कराँची सिटी एफसीले लगातार बराबरी खेलेको छ । कराँचीले बंगलादेशको नासरिन स्पोर्ट्स एकेडेमीसँग गोलरहित खेल्दै अंक बाँडेको हो । कराँचीको २ खेलबाट २ अंक भएको छ । समान खेलबाट नासरिनले पहिलो अंक जोडेको छ । नासरिन यसअघि पहिलो खेलमा नेपालको एपीएफ क्लबसँग ४-० को पराजित बेहोरेको थियो ।

च्याम्पियनसिपका खेल राउन्ड रोबिन आधारमा हुनेछन् । लिग चरणमा शीर्ष र दोस्रो स्थानको टिमले फाइनलमा प्रतिस्पर्धा गर्नेछन् । च्याम्पियनसिपको विजेताले १० हजार अमेरिकी डलर र उपविजेताले ५ हजार अमेरिकी डलर तथा बाँकी तीन टोलीले समान २ हजार अमरिकी डलर प्राप्त गर्नेछन् ।

एन्फाले प्रतियोगिताको लागि दुई खालको टिकटदर कायम गरेको छ । साधारणतर्फ ३०० र भीआईपीतर्फ ५०० को टिकट मूल्य राखिएको छ । टिकट खल्ती एपमार्फत खरिद गर्न सकिनेछ । प्रतियोगिताको लागि अनुमानित बजेट ३ करोड ७७ लाख ७७ हजार ९० रुपैयाँ रहेको छ ।