अखबार नेपाल ट्रेन्डिङ

काठमाडौं: साफ महिला क्लब च्याम्पियनसिपमा आज दुई खेलहरु हुँदैछन् । दशरथ रंगशालामामा हुने पहिलो खेलमा श्रीलंकाको ट्रान्सपोर्ट युनाइटेड र भारतको इस्ट बंगालबीच खेल हुनेछ । यी दुईबीचको खेल दिउँसो २:०० बजे हुनेछ भने दास्रो खेल पाकिस्तानको कराची सिटी र बंगलादेशको नसरिन स्पोट्स क्लबबीच हुनेछ । यी दुईबीच दशरथ रंगशालामा नै साँझ ६ बजे सुरु हुनेछ ।

श्रीलकाको क्लब युनाइटेडको यो दोस्रो खेल हो । पहिलो खेलमा पाकिस्तानको कराची सिटीसँग एक-एकको बराबरी खेलेको युनाइटेडलाई जित्नै पर्ने दबाब छ । साबिक विजेता इस्ट बंगालको भने यो पहिलो खेल हो । बंगलादेशको नसरिन स्पोट्स क्लब नेपालको आर्म पुलिस फोर्स (एपीएफ) साँग ४-० गोल अन्तरले पराजित भएको थियो भने कराचीको एक अंक छ ।

नेपाली टोली एपीएफको खेल आगामी बिहीबार श्रीलंकाको ट्रान्सपोर्ट युनाइटेडसँग हुनेछ । आफ्नो पहिलो खेलमा बंगलादेशको नसरिन स्पोट्सलाई ४­-० गोल अन्तरले हराएको छ । दक्षिण एसियाका पाँच टोली सहभागी प्रतियोगिताको एपीएफ ३ अंकका साथ शीर्ष स्थानमा छ ।

च्याम्पियनसिपका खेल राउन्ड रोबिन आधारमा हुनेछन् । लिग चरणमा शीर्ष र दोस्रो स्थानको टिमले फाइनलमा प्रतिस्पर्धा गर्नेछन् । च्याम्पियनसिपको विजेताले १० हजार अमेरिकी डलर र उपविजेताले ५ हजार अमेरिकी डलर तथा बाँकी तीन टोलीले समान २ हजार अमरिकी डलर प्राप्त गर्नेछन् ।

सहभागी टिमलाई प्रशिक्षणको लागि च्यासलस्थित च्यासल रंगशाला र भद्रकालीस्थित नेपाली सेनाको खेल मैदानमा व्यवस्था गरिएको छ । एन्फाले प्रतियोगिताको लागि दुई खालको टिकटदर कायम गरेको छ । साधारणतर्फ ३०० र भीआईपीतर्फ ५०० को टिकट मूल्य राखिएको छ । टिकट खल्ती एपमार्फत खरिद गर्न सकिनेछ । प्रतियोगिताको लागि अनुमानित बजेट ३ करोड ७७ लाख ७७ हजार ९० रुपैयाँ रहेको छ ।