अखबार नेपाल ट्रेन्डिङ

काठमाडौं: आईसीसी टी-२० विश्वकप एसिया तथा ईस्ट एसिया प्यासिफिक छनोटमा नेपालले आज कतारसँग खेल्दैछ । ओमानको अल अमिरेत क्रिकेट रंगशालामा यो खेल नेपाली समय अनुसार राति ८:१५ बजे सुरु हुनेछ ।

सुपर-६ को आफ्नो पहिलो खेलमा आईतबार नेपालले चिरपरिचित प्रतिद्वन्द्वी युएईमाथि १ रनको रोमाञ्चक जित निकालेको थियो । प्रतियोगितामा नेपाल समूह ‘बी’का दुवै खेल जित्दै सुपर-६ मा आएको थियो । नेपालले समूह चरणको पहिलो खेलमा कुवेतलाई ५८ रनले हराएको थियो । नेपालले दोस्रो खेलमा जापानविरुद्ध पाँच विकेटको जित निकालेको थियो । नेपाल लगातार चौथो जितको खोजीमा छ ।

कतार समूह चरणमा मलेसियालाई पराजित गर्दै सुपर-६ मा आएको हो । समूह ‘ए’ मा कतार युएईसँग पराजित भएको थियो भने मलेसयालाई ८ विकेटले कतारलाई हराएको थियो । सुपर-६ मा भने कतार ओमानसँग ३४ रनले पराजित हुन पुग्यो । यी दुई टोलीबीच अहिलेसम्म तीन खेल हुँदा नेपालले २ तथा कतारले एक खेल जितेका छन् । अपराजित नेपालको सुपर-६ मा ४ अंक भएको छ भने कतार अंकविहीन छ ।

सुपर-६ मा रहेका पाँचमध्ये चार टिमसँग प्रतिस्पर्धा गर्नेछ । नेपालले प्रतिस्पर्धा गर्ने टिममा युएईसँगै कतार, ओमान र समाओ छन् । नेपालले आफ्नै समूहबाट सुपर-६ मा आएको जापानविरुद्ध भने प्रतिस्पर्धा गर्ने छैन ।

अब यो चरणमा हुने १२ खेलपछि शीर्ष ३ स्थान हासिल गर्ने टोलीले २०२६ फेब्रुअरी र मार्चमा भारत र श्रीलंकामा हुने विश्वकपमा स्थान बनाउने छन् ।  नेपालले बुधबार ओमानसँग खेल्नेछ भने सुपर-६ को अन्तिम खेलमा शुक्रबार सामोआसँग खेल्नेछ ।